Home Uncategorized Shirma Rouse: Un homenahe na Aretha Franklin “ The Queen of Soul”

Shirma Rouse: Un homenahe na Aretha Franklin “ The Queen of Soul”

SHARE

Shirma Rouse a bira conoci como cantante di koor, e la canta cu e mihonan den e mundo di musica manera: Anouk, Alain Clark, Chaka Khan, Wouter Hamel, Michael Bolton, Ladies of Soul, Orkesta Metropole y hopi otro mas. Cu su participacion convincente na “The Voice of Holland” el a sabi di conkista curason di un publico grandisimo.

Shirma Rouse a crece riba e isla di Sint Eustatius, el a sali di e forma trankilo y comodo di Caribe a muda y ta biba un bida artistico acelera na Hulanda. Shirma Rouse practicamente a absorba su talento musical pa medio di osmosis genetico.Tur su dos welanan  tawata  musico di iglesia. Shirma a cuminsa canta den su iglesia tempo cu e tawatin seis aña di edad.  Su tata tambe tawata un musico profesional, mescos cu su ruman homber.

En realidad  Rouse a bay Europa pa studia kimica, pero den e prome lunanan , el a forma parti di un koor na hulanda y a cuminsa canta y tour cu artistanan. Esaki no tawata e plan, y a djis pasa. Rouse a tuma e cambionan di plan aki como un bendicion  y completa su “Bachelor’s Degree di Jazz Vocals” y e resto ta historia.

Na aña 2010  ela lansa su prome CD riba Mercado cu temanan principalmente di soul titula “ Chocolate Coated Dreams”. Shirma a lansa 3 album y su di tres album “Shout It out Loud”, a ser premia na aña 2015 pa “Edison Jazzism Audience Award”. Na Maart di 2017 Shirma a lansa su di cuater album tan spera, “Soul Senerade”, un bunita homenahe pa duna honor na Amor cu su cancionnan nobo y recientemente compone, den duo cu e sensacion mericano “Ryan Shaw”, cu cancionnan clasico manera “Imagine” cu a ser aregla den un forma nobo y innovativo.

Na aña  2013 el a  compaña hunto cu Anouk como cantante di koor, pa participa na e Eurovision Songfestival na Malmö. Aki el a wordo proclama como e miho cantante di koor pa “The Eurovision Times”. E mesun aña ey Rouse a participa na “The Voice of Holland”. Durante su audicion tur e stoelnan a draai mes ora y el a escohe Trijntje Oosterhuis como su coach.

Den e temporada di teatro durante 2012 pa 2013, Shirma Rouse a lansa un tour di teatro tocante e bida di  “ The Queen of Soul” Aretha Franklin. Despues cu e director  artistico di e orkesta  Metropole a duna Shirma un DVD di presentacionnan en bibo di Aretha Franklin na Hulanda, Rouse a keda asina impresiona cu el a dicidi di duna un homenahe na Aretha Franklin.

E aña aki Aretha Franklin lo cumpli 75 aña. Y asina Rouse a dicidi pa presenta e conceirto Aretha Franklin “The Queen of Soul” atrobe riba scenario y celebra su bida y su musica. Aretha Franklin “The Queen of Soul” ta un presentacion musical, cu ta duna e publico un bista unico den e bida di Aretha Franklin, e hende muhe,e mama y e persona tras di e stem di soul. Bao guia di un formacion di ocho stem Shirma Rouse ta canta “Think”, “Bridge over troubled Water’, ‘Respect” y hopi otro favoritonan.

No perde e opurtunidad di mira y scucha e gran presentacion aki di Shrima Rouse su homenahe na Aretha Franklin diasabra di 16 di September, 2017 na Renaissance festival plaza cu Caribbean Sea Jazz Festival. Probecha y pasa cumpra bo “Early bird ticket special” awe mes na Casibari Café, Supefood of riba nos website na www.caribbeanseajazz.com pa solamente $50 pa anochi of $90 pa e weekend.