Home Uncategorized Parlamentario mr. Juan E. Thijsen (MEP): Sondeo di Departamento di Labor ta...

Parlamentario mr. Juan E. Thijsen (MEP): Sondeo di Departamento di Labor ta confirma cu cambionan di ley haci door di Otmar Oduber y AVP a perhudica e mercado laboral.

SHARE

Parlamentario mr. Juan E. Thijsen a tuma nota di un sondeo haci pa Bureau di Arbeidsinspectie, e seccion di inspeccion laboral di Departamento di Labor. E sondeo a ser haci pasobra Departamento di Labor tabata ricibi kehonan riba companianan den nos mercado laboral. Departamento di Labor a bin ripara cu ta hopi abuso tin ta tumando luga cu uitzending di trahadonan ( ubicacion di un trahado cerca un otro dunador di trabao). Por ehempel ta duna trahadonan ainda un uitzendovereenkomst, loke pa ley no permiti. E noticianan aki pa Parlamentario mr. Juan E. Thijsen no ta un sorpresa. Durante e tratamento den Parlamento ya caba Parlamentario mr. Juan E. Thijsen y Fraccion di MEP a spierta ex-Minister di Labor y actual lider di Partido POR Otmar Oduber cu e cambionan haci pa cu e mundo di “uitzending” lo no trece mehoransa sino lo perhudica esnan laborando como uitzendkracht y pio ainda lo danja e mercado laboral. Ta di resalta segun Parlamentario mr. Juan E. Thijsen cu Ministro di Labor non activo ilegalmente y actualmente sospechoso di Ministerio Publico Paul Croes tambe a mira e problemanan causa pa ex-Ministro di Labor Otmar Oduber y Ministro Paul Croes a anuncia di lo a bin cu leynan di correcion (reparatiewet).  Sinembargo Ministro di Labor Paul Croes no a bin cu ningun cambio di ley pa remedia e situacion malo riba mercado laboral pero al contrario a yuda danjele mas ainda. Un di e problemanan grandi di e uitzendkracht segun Parlamentario mr. Juan E. Thijsen ta e insiguridad di trabao. E trahado aki por wordo kita for di trabao na cualkier momento y no tin ningun proteccion. E cambionan di Otmar no a yuda y awor Departamento di Labor ta bin confirma esaki. E uitzendkracht na anja 2017 ainda ta biba den un incertidumbre y no por traha un cas ni cumpra auto pasobra prestamo ta wordo duna a base di trabao fiho.

Director di Departamento di Labor, Nick Kock ta confirma cu tin hopi cos ainda cu ta pasando cu no ta corecto. Parlamentario mr. Juan E. Thijsen ta sumamente sorprendi cu Departamento di Labor awor numa ta bai exigi cu tur e contractnan di stranheronan tin cu pasa DPL. Esaki ta confirma e rumor den pueblo cu negoshi tabata ser haci cu e permisonan ya cu nan no tabata pasa e control normal. Conclusion di Parlamentario mr. Juan E. Thijsen ta cu aki nan e problema di ontheffing pa cual Ministro di Labor Paul Croes ta ser investiga ta hunga un rol grandi. Ministro di Labor den cuadra di su negoshi cu permiso a facilita e procedura pero den mesun momento a habri e caminda pa dunador di trabao abusa di e trahado. E contractonan di uitzend no ta pa trahadonan di exterior.  Segun Parlamentario mr. Juan E. Thijsen ta resalta cu e propio Director di Labor ta confirma cu cosnan por ta bon regla riba papel pero den practica nada no ta cuadra. Nick Kock: “Tin cu bisa si cu ta keda naturalmente e hecho cu companianan por bay DPL y entrega tur documento na ordo, pero cu den practica, cosnan ta bay poco otro. Cosnan no ta bay segun palabracionnan di ley”. Conclusion di Parlamentario mr. Juan E. Thijsen ta cu e cambionan di Otmar Oduber y e drumimento di Paul Croes a haci un pio tutu di mercado laboral di loke su persona y Fraccion di MEP a premira. Pa es motibo aki  Parlamentario mr. Juan E. Thijsen tin un serie di cambionan pa haci riba mercado laboral den bienestar di e clase trahador y tambe e dunador di trabao. Parlamentario mr. Juan E. Thijsen y partido MEP ta cla pa e reto di mehora e mercado laboral. Hunto p’e cambio.