Home Uncategorized K.I.A. por ofrece mas siguridad na detenido y trahadonan

K.I.A. por ofrece mas siguridad na detenido y trahadonan

SHARE

ORANJESTAD, Aruba –Director di Instituto Coreccional Aruba, K.I.A., Rocco Tjon, a bisa di ta hopi contento cu e “software” pa e proyecto “camera toezicht” presenta recientemente na K.I.A. E calidad di imagennan ta tremendo y a duna di conoce tambe cu ya caba durante e periodo di instalacion, a topa situacionnan cu a duna oportunidad di haci uzo di e grabacion na bienestar di investigacion.

Pa loke ta trata organisatoriamente e tawata un reto pa empleadonan di K.I.A., na momento cu a start cu e proyecto aki. Ta pa e motibo aki mes tambe cu Rocco Tjon a gradici su coleganan y e compania local SafeCom, pa e bon trabou desplega.

Institutonan correcional ta wordo evalua riba e “clima” cu tin den e organisacion. Mester tin un “clima” humano, of manera nan ta yam’e na Hulandes mester ta un “humaan gevangenis klimaat”. Esaki ta wordo evalua door di mira e programa di actividadnan na e detenidonan, e relacion entre detenido cu detenido y tambe e relacion entre detenido y cuidadonan di preso.

Si acaso cu tin un keho of un “integriteitsbreuk”, ta determina con e organisacion ta atende cu esaki. Un otro aspecto importante ta banda di e “humaan gevangenis klimaat” ta e “interne veiligheid”. Y riba e aspecto aki ta nota e proceduranan cu tin y tambe con ta haci pa garantisa siguridad, es decir ki herment tin pa por eleva siguridad.

Mirando e obligacionnan cu tin stipula den e reglanan fiha pa cu esaki, e jaarplan di KIA ta contene proyectonan specifico pa como organisacion yega mas cerca posibel di un audit positivo. E proyecto di camara aki y e software sigur ta di un balor agrega pa KIA como organisacion y muy en particular pa tur hende cu ta biba of traha na KIA tur dia.

Por ultimo, e proyecto aki ta bay eleva e siguridad interno den K.I.A. No solamente pa e detenidonan, pero particularmente pa e trahadonan den K.I.A. E sistema moderno aki ta haci e instituto mas adecua pa ricibi bishitantenan, specialmente ora mester duna cierto cursonan of brinda actividadnan recreativo pa e detenidonan. Asina tambe ta duna e balor na e instituto aki pa loke e ta den principio, esta un instituto coreccional.