Home Uncategorized DOW for di prome instante a envolvi Santa Rosa pa yuda replanta...

DOW for di prome instante a envolvi Santa Rosa pa yuda replanta mata riba Watty Vos Boulevard

SHARE

ORANJESTAD – Cu tur proyecto di infrastructura, Gabinete Mike Eman ta enfatisa e importancia di embeyecemento di e proyecto cu mata y atencion pa naturalesa en general. Santa Rosa ta cooperando estrechamente cu proyecto di Watty Vos Boulevard riba e tema aki riba topiconan manera planta mata riba henter e ruta.

Directora di Departamento di Agricultura, Cria y Pesca (Santa Rosa) Natalie Maduro den un declaracion duna recientemente a bisa cu nan ta trahando hunto cu DOW pa sigura cu unda matanan ta wordo kita pa construccion, ta planta otro mata na su luga. Esaki ta bay hunto cu e vision cu tin e meta pa planta 10.000 mata na Aruba.  Primeramente, Maduro a splica, DOW a acerca tanto Santa Rosa como Departamento di Medio Ambiente pa colabora cu nan den e proyectonan di Infrastructura, pa sigura un forma di control y sigui planta mas mata.

Pa algun aña caba Santa Rosa tin un proyecto den ehecucion cu yama “10.000 mata pa Aruba”, tanto matanan di fruta como matanan local cu mester wordo preserva. Continuamente Santa Rosa ta trata di motiva ciudadano y empresanan pa preserva matanan local, sin lubida matanan di fruta cu tambe ta importante. Pa duna su colaboracion, Santa Rosa a ricibi e plan completo di e compania cu ta trahando riba Watty Vos Boulevard pa haci un estudio con ta bay na planta riba henter e ruta. Cada dos siman tin reunionnan tumando luga cu DOW y Departamento di Medio Ambiente pa hunto planea cada fase di henter e proyecto.

A cuminsa rosa matanan riba e prome fase, cu ta cay for di aeropuerto te cu ex Codemsa. A kita varios mata pero toch a laga un concentracion di matanan chikito, cu ta wordo uza como sombra pa trahadonan y pa tene cuenta cu e parhanan. Aworaki ta haciendo un evaluacion di e matanan cu tin disponibel den Santa Rosa p’asina cu asina cu cada fase di construccion ta cla, cuminsa entrega e matanan na DOW pa cuminsa planta bek riba e ruta. A conseha DOW pa envolvi gruponan di comunidad manera Padvinders y NGO-nan pa yuda den replantacion. “E ta un proyecto bunita pa henter Aruba, mas bo involucra comunidad, mas balor nan lo duna na esaki.”

Ki tipo di mata specifico ta bay pone riba e ruta no ta conoci ainda, pero si mester tene cuenta cu e tipo di tera cu tin, cu ta e matanan existente na e sitio (pa no cambia e estado natural). No mester lubida cu matanan di fruta ta rekeri hopi awa y mirando cu e ruta ta hopi largo, ta purba di uza matanan cu ta fit den e medio ambiente existente y cu no ta rekeri hopi mantencion y awa. Santa Rosa tin matanan disponibel cu ta satisface tur diferente rekisitonan di cada area den e ruta.