Home Uncategorized Diadomingo rond 2 di Play-of 2016/2017 ta sigui RCA ta na prome...

Diadomingo rond 2 di Play-of 2016/2017 ta sigui RCA ta na prome luga den play-off di AVB Deportivo Nacional a gana SV Dakota cu score di 4-0

SHARE

ORANJESTAD, Aruba: E prome rond di e Play-off 2016/2017 di Arubaanse Voetbal Bond a termina despues di weganan candeloso. E teamnan di RCA, Britannia, La Fama y Dakota a hunga den e prome 3 wega cada uno, unda cu nan a sa di duna bataya fuerte. Pero awo cu e prome rond a completa, RCA ta na prome luga.

 

Diamars anochi RCA a topa e team di Britannia, unda cu ambos team a subi tereno dicidido pa bay cu e victoria. Desde inicio di wega ambos team tabata busca pa pasa e defensanan pa asina tira riba gol. Na di 8 minuut di wega Steven Rua a tira un pase pa Eric Santos, kende na su turno ta toke e bala y manda esaki den gol. Asina aki RCA a bay ariba den e prome mita tempo. Britannia no a rindi y 11 minuut a busca e gol di empate cu tiro di Bruno, pero no a logra esaki ya cu e bala a cay den man di e keeper. E wega a continua y e prome tempo a bay aden cu RCA ganando 1-0.

 

Den e di dos tempo RCA a subi tereno un biaha mas buscando mas gol y a haya algun oportunidad pero no a probecha di nan. Di otro banda Britannia tabata ataca fuerte buscando e gol di empate, pero e defensa di RCA tabata contra ataca fuerte. Britannia a cuminsa ataca fuerte te ora cu un carchi cora a cay durante e wega, na momento cu John Lugaydi Britannia a scop un hungado di RCA na su cabes ora cu e tabata tira abou. Referee DeLecca a mira esaki y di biaha a saca e carchi cora. Na final di wega RCA a bay cu e victoria di 1-0 pa asina bay ariba den e standing.

 

Diaranson anochi Deportivo Nacional a topa cu Dakota. Desde comienso di wega Deportivo Nacional a busca pa domina e wega, unda cu tabata busca pa pasa e defensa di Dakota. Na 4 minuut di wega Devis Oliveros a anota e prome gol pa Nacional. Dakota a busca gol di empate den un tiro di skina pero keeper Jose Cruz a sa di evita esaki. Nacional a sigui ataca y na varios ocasion keeper Abdul a scapa Dakota. Kenroy a manda un pase pa Killer Francis kende a pone Nacional ariba cu e score di 2-0. Wega a continua fuerte unda cu Kenroy a anota e di 3 gol den e prome tempo. Den e di dos tempo e di 4 gol a cay door di un tiro di skina unda cu e defensor Rensly Tromp a anota esaki. Dakota na varios ocasion a tira riba gol pero no a logra anota. Na final e wega a termina 4-0 pa Nacional.

 

Den e standing RCA ta na prome luga cu 6 punto, y pa motibo di averahe di gol Deportivo Nacional ta na di dos luga cu 4 punto, Dakota na di tres luga cu 4 punto y Britannia na di cuater luga cu 2 punto. Diadomingo 29 di Mei pa 6:00 PM Britannia lo enfrenta Dakota den e di dos rond, mientras cu pa 8:00 PM RCA lo enfrenta Nacional. Yega stadion na Dakota y bin apoya bo team preferi.