Home Uncategorized Mireille Sint Jago di MEP: Educacion por caba cu criminalidad

Mireille Sint Jago di MEP: Educacion por caba cu criminalidad

SHARE

E resultadonan di educacion na Aruba a bay hopi atras y na e mesun momento e cifranan di criminalidad a subi. No ta hende di afo so ta haci actonan criminal, sino ta nos mesun hendenan tambe. Con nos por bolter e situacion aki? Aruba por scapa miyones pa aña, door di inverti den educacion enbes di inverti den gastonan pa un prison. Si nos percura pa e mucha hombernan den scol secundario keda na scol y cu e porcentahe di graduacion di nos hobennan subi cu solamente 5%, ya caba nos por wak un diferencia grandi. Mi ta sigur, cu cada hende cu ta paga impuesto aki na Aruba lo prefera pa e placa aki wordo inverti den educacion enbes di un prison! Sea abo mes tin yiu si of no, e efecto di NO inverti den enseñansa por toca cada un di nos.

E ultimo añanan nos a wak con Gobierno a haciele hopi mas dificil pa nos hobennan por tin un miho perspectiva academico. Caminda na Hulanda 60% di e hobennan ta studia na un nivel di HAVO y mas halto y cu na Corsou 40% ta logra e nivel di HAVO y mas, na Aruba pa 7 aña largo e cantidad di muchanan cu ta bay Colegio despues di klas 6 a wordo wanta na 15%!! Esey kiermen cu mayoria di nos muchanan ta bay MAVO y EPB despues di 6e klas. Esey riba su mes no ta crea e problema, ta e situacion, cu muchanan no ta haya e oportunidad pa haya un educacion cu ta pas cu nan manera di siña. Si e nivel di educacion no ta un reto pa nan, nan ta perde interes y motivacion cu e consecuencia cu nan lo no duna ningun resultado mes ni riba e nivel abou. Un hoben cu ta convenci cu su comunidad a lagu’e na caya, lo no respeta e mesun comunidad.

E ta cientificamente prueba, cu criminalnan mayoria biaha no tin un EDUCACION hopi halto. Mi ta pone enfasis riba educacion, pasobra esey no kiermen cu nan no ta inteligente! Si nos percura pa hisa e nivel di educacion di tur mucha, percura pa tur hoben logra gradua cu un diploma, nos por baha e cifra di criminalidad! Pa casi un decada largo, Gobierno di AVP a wanta pueblo abou, p’esey ami no ta sorprendi cu awor e cifra di criminalidad a subi: Bo ta cosecha locual bo ta sembra. AMI ta di opinion, cu nos lo mester hinca hopi mas energia y placa pa mehora e clima na scol. Crea scolnan cu ta duna nos hobennan mas guia y structura, siña nan pa ta mas disciplina, creativo y desaroya nan habilidadnan social. Diversificacion di e curiculo cu mas tareanan practico, lo haciele hopi mas atractivo pa cualkier mucha pa participa activamente pero tambe pa nan compronde e teoria mas miho.

Cu e ta posibel, esey a wordo prueba caba na diferente pais. Amplia e dia di scol, crea scolnan cu un caracter y meta specifico, no ta un idea nobo, pero si nos no cuminsa ehecuta e ideanan aki, nos lo haya nos mes den mas problema den futuro aki na Aruba. E cifra di criminalidad lo no baha! Nos  mester involucra mas variacion den e forma di educa nos muchanan y hobennan. E tarea aki no por ta den man di nos maestronan so. Lo mester amplia e team cu ta traha na un scol pa asina e trabou duro di un maestro por wordo comparti cu mas hende y cada mucha haya mas atencion. Pasobra locual falta mas cu tur, ta atencion. Den un klas cu mas cu 24 mucha, e muchanan no por haya debido atencion di e maestro. Pio ainda, si ta trata muchanan cu tin problema cu e idioma di instruccion, manera ta e caso cu casi tur mucha na Aruba!! P’esey, na varios pais, pero tambe na algun scol na Aruba, tin mayornan cu ta yuda cu tareanan voluntariamente. Na Aruba nos tin pensionadonan cu kier yuda part-time. Nos lo mester pensa den e direccion di traha cu klassenassistent pa scol primario y secundario structuralmente. Tin hopi solucion… awor falta e dedicacion pa cuminsa crea e scol di futuro, awe mes.