Home Uncategorized Companianan di utilidad ta lansa proyectonan grandi

Companianan di utilidad ta lansa proyectonan grandi

SHARE

ORANJESTAD, Aruba – “Esaki ta e caminda cu nos ta canando e ultimo añanan y mi ta masha orguyoso di mira companianan di utilidad cana e mesun ruta pa hunto nos logra e mesun metanan”, asina Minister Ing. Mike de Meza, encarga cu maneho di Turismo, Transporte, Energia y Medio Ambiente a bisa despues di a testigua firmamento di inicio di dos proyecto grandi. Ta trata aki di e proyecto di “Sunrise Solar Park” na Lago Heigths di WEB y e proyecto “ICT Infrastructure & Data Center” entre WEB y e compania Dell.

Den e prome acuerdo, Refineria di Aruba N.V. a pone un tereno grandi disponibel pa WEB por instala e parke solar mas grandi den Caribe, di 5.9MW, di 92 mil meter cuadra y cu ta costa 16 miyon florin. E lo ta cla den 8 luna di tempo. Na final, 5% di e red di coriente produci na WEB lo ta procedente di solo mientras cu 18% lo ta di biento!

E di dos proyecto ta un solo red nobo y centralisa cu lo interconecta tur sistema di control di e planta y tambe aplicacionnan administrativo. Cu e sistema moderno aki, cu ta costa casi 9 miyon florin, WEB ta garantisa cu nan ta capacita y prepara pa futuro retonan riba tereno di ICT.

“Pa logra tur esaki, nos companianan di utilidad mester a traha hunto. Setar por ehempel ta esencial den henter e infrastructura di ICT, ELMAR como compania ruman di WEB lo ta conecta riba e red di coriente y sin lubida RDA cu a pone tereno disponibel pa e parke di solo. Utilities Aruba, siendo e compania madre, a percura pa tur compania ta na mesa y hunto traha pa na 2020 nos isla ta menos dependiente di energia tradicional y ta mas dependiente di energia renoba”, asina Minister Mike de Meza a bisa.

E mandatario a felicita tur envolvi, pa nan profesionalismo y dedicacion pa logra dos proyecto grandi pa nos pais, cu lo tin efectonan positivo pa consumidornan tambe.