Bloomberg news, ta un agencia grandi di noticia ubica na New York, cu a publica e siguiente articulo, diahuebs, 25 di mei 2017. Un articulo den cual Aruba su nomber un biaha mas ta wordo poni den un luz negativo. Segun e articulo aki ta bisa, cu Syria y Venezuela recientemente a cera un deal secreto pa transporta crudo prohibi di Syria, via Rusia pa Caribe y asina yuda Syria scapa di e sanction international cu tin riba e pais aki.
E intencion tabata di bende e crudo di Syria hopi barata cu Venezuela via un compania di Shell na Russia y esaki na su turno lo a mande Aruba pa refina y despues pa distribucion di e ‘gasstations’ na Merca y aparentement mas destinacion, segun emails, entrevista y de mas informacion cu Bloomberg lo a ricibi.
Aruba a wordo menciona den e parti di Caribbean Scheme, no ta full claro si e plan ainda ta den consideracion. Un di e personanan prominente den e esquema aki tabata e Venezolano Wilmer Ruperti, kende ta un negociante den petroleo, cu a crece bira hopi rico den negoshi aki y kende ta un persona hopi yega di e presidente di e pais aki, segun un entrevista via telefon ela duna di conoce cu e lo a sali afo y no ta participando mas den e esquema aki.
Segun Ruperti officialnan di Syria a acerk’e cuminsamento di 2012 durante un fiesta na e Club di Syria na Caracas. E tempo ey e tabata ta huur un cas na e parti Nort di Aruba y tabata tin hopi interes den e Refineria di Aruba, te hast elo a ofrece un persona 15 miyon dollar pa yude cumpra e refineria di Aruba.
Ruperti te hasta lo a topa cu Prome Minister Mike Eman y tambe cu Minister Mike De Meza. Segun Bloomberg ambos mandatario a nenga na varios ocacion di duna nan un entrevista.
Pa hopi persona na Aruba, e tabata un shock, na momento cu nan a haya sa cu Aruba lo por ta meti den un complot pa refina crudo di Syria. Oficialnan mericano a duna di conoce cu trahando e plan so ya ta viola e sanction internacional cu tin actualmente riba Syria.
Segun Bloomberg Sr. Alvin Koolman, top oficial di e refineria di Aruba, a duna di conoce den un entrevista, cu e compania lo bay investiga cualke intento cu lo por a viola e Sanction y lo ta den cooperacion cu Oficialnan mericano. Cualke cos cu lo por sali na cla lo wordo para mesora, segun Koolman lo a duna di conoce na Bloomberg.
Tambe segun Koolman, desde cu Citgo a firma e lease agreement te e dia di awe e refineria no a procesa nada di petroleo.
Segun e shipping data cu Bloomberg mes a track, no tin niun evidencia cu un di e oiltankernan lo por a tuma e ruta saliendo for di Syria pa Russia y sigui pa Caribe.
Segun Bloomberg, oficialnan local no ta na altura di e esquema cu e crudo di Syria. Na September ta bay tin elecion y e refineria sigur lo bira un cabay di campaña, paso e ciere di e refineria a causa hopi sufrimento y desempleo desde maart 2012, na momento cu Valero a para tur su operacion. Valero tabata un di e dunadornan di trabou mas grandi na Aruba y esaki a pone cu e isla a cay pisa den un recession.
Actualmente Aruba ta depende solamente riba turismo, segun International Monetary Funds. Den e articulo ta menciona cu parlamentario den oposicion Sr. Dangui Oduber a keda den un shock y bisa cu nos industria turistico no por afford wordo relaciona cu e gobierno di Syria. Ela keda di pidi un reunion publico, pa asina trece Minister Eman y otro ministernan cu a firma e Citgo Lease prome cu parlamento, pa nan bin den parlamento y por duna cuenta.
Kiko cu lo pasa cu e refineria, e complot cu a wordo descubri a habri caminda pa hopi pregunta y possibel esfuersonan haci y cu ainda no a wordo exponi.
