Home Uncategorized Parlamentario mr. Xiomara Maduro: Gobierno kier oficialisa un pocicion pa Minister...

Parlamentario mr. Xiomara Maduro: Gobierno kier oficialisa un pocicion pa Minister Croes cu no ta existi y cu ta contra ley

SHARE

Cada dia cu pasa, mas y mas e gobernacion na nos Pais ta conociendo degradacion. E manera con Gabinete Eman ta anda cu e caso di Minister Paul Croes ta ehempel bibo di e degradacion aki. Nos a yega asina lew na unda cu Gobierno kier oficialisa un pocicion pa Minister Croes cu no ta existi y cu ta contra ley.

 

Traspasa cartera via ley y no decreto

Den e decreto di 12 di mei ultimo, Minister Eman ta traspasa e cartera di Minister Croes pa Minister Bermudez. E traspaso aki ta contra ley, ya cu articulo II.5 di nos Constitucion ta stipula cu instalacion di ministerio mester pasa pa ley y no por medio di un decreto.

 

A crea Minister sin cartera

Cu e traspaso di cartera, Minister Croes a keda sin cartera. Nos leynan no conoce un Minister sin cartera. Esaki ta enpugna cu Articulo II.5 di nos Constitucion cu ta stipula cu cada ministerio ta bou guia di un Minister. Banda di esaki articulo 10 di e Ley pa institui ministerios ta stipula cu cada minister tin guia y ta responsabel pa un ministerio. Pues e puesto di Minister sin cartera cu Minister Eman ta crea aki pa sr Croes ta contra nos leynan.
Minister no por haya ontheffing

Remarcabel ta cu e decreto ta papia di libra Minister Croes temporalmente di su encargonan di e ministerio di Asunto Social, Hubentud y Labor. Esaki tambe ta contra ley ya cu Articulo II.2 di nos Constitucion ta stipula cu un Minister por wordo nombra of wordo retira den consulta cu Parlamento. Ningun caminda ta para cu un Minister por wordo libra di su responsabilidad temporalmente. Y pa haci esaki mester a consulta Parlamento di Aruba, locual tampoco a tuma lugar.
Nos mester respeta y defende nos Constitucion

Cada mandatario a huramenta pa tene nan mes na e leynan di Aruba, pero den e caso di Minister Croes a bira bisto cu Gabinete Eman y e Parlamentarionan di AVP no ta respeta, corda pa defende nos leynan. E Gobierno aki a bay asina lew di hasta trapa riba nos Constitucion y tur esaki bou responsabilidad di Promer Minister Eman. Esaki ta un eror grandi ya cu nos mandatarionan ta e promer yama pa respeta y defende nos leynan, specialmente nos Constitucion. Nos mester tene na cuenta cu si awor bo no por respeta y defende e Constitucion di nos Pais, e ora mayan no ta bale la pena yora ora caos apodera di nos Pueblo.

 

Cambio ta necesario

Nos lo percura pa haci pregunta oficial riba e eror aki di Minister Eman, aunke nos sa di adelanta cu Eman no tin e decencia pa contesta ningun pregunta di opocicion. Pa e motibo aki y hopi mas un cambio ta necesario na nos Pais y pa e cambio concretisa, Pueblo mester libra Aruba di un Minister President Eman cu no ta respeta corda defende e Constictucion di nos Pais.