Home Uncategorized Pa 26 aña largo Garage Cordia brindando servicio na nos maximo mandatario...

Pa 26 aña largo Garage Cordia brindando servicio na nos maximo mandatario Gobernador di Aruba a ricibi su di 10 auto marca Lexus

SHARE
????????????????????????????????????

ORANJESTAD, Aruba: Garage Cordia Aruba despues di 26 aña largo, a entrega e di 10 auto nobo, un modelo Lexus Hybrid, na Gobernador di Aruba. Director di Gabinete di Gobernador, Raken Budhu Lall a acepta e yabinan for di mannan di e gerente di Garage Cordia, agencia di autonan marca Lexus.

 

Desde aña 1991 Garage Cordia ta entregando e autonan na Gabinete di Gobernador y nan ta masha contento y ta aprecia masha hopi mes cu te awe Gobernador ta kere y ta sinti hopi confortabel di core den un Lexus. “E Lexus despues di casi 3 aña ta bin como Hybrid, cu ta miho pa nos medio ambiente y Gobernador ta kere den esey y Gobierno tambe ta kere den esey. Nos ta sumamente contento cu esey”, asina e Chief Executive Officer di Garage Cordia, esta Danilo Werleman, a remarca.

 

Diabierna Garage Cordia a entrega e Lexus nobo cu ta e modelo LS 600H, cu ta e sedan di mas grandi cu Lexus ta traha. Den Caribe esaki ta e di 7 auto cu Lexus ta entrega den Caribe y a entrega tur 7 na Aruba, Danilo Werleman a remarca. Pa Garage Cordia esey ta un privilegio di entrega un auto asina aki y Hybrid. Toyota tin e modelo Hybrid pa casi 20 aña y na Aruba tin esaki pa e ultimo 10 añanan. Garage Cordia ta ofreciendo e modelonan aki pa algun aña caba. Ta trata di no menos di 12 diferente modelo di Hybrid.

 

Director di Gabinete di Gobernador, Raken Budhu Lall a indica cu e escogencia pa e Lexus ta asocia cu Toyota. E Gabinete di Gobernador ta satisfecho cu e presentacionnan di Toyota pero tambe cu Garage Cordia. “Esaki ta e di 10 auto cu Gabinete di Gobernador ta cumpra for di Garage Cordia”, Raken Budhu Lall a duna di conoce. Loke cu ta 2 punto importante ta, 1: E auto ta di Gobernador y esey ta nifica cu e estilo pe funcion di Gobernador mester ta expresa y 2: E auto mester ta sigur pa Gobernador. Gabinete di Gobernador a stap over pa Hybrid 3 aña pasa y e ta gasta menos gasolin cual ta bon pe medio ambiente. Mas ainda, pa Gabinete di Gobernador ta importante cu medidanan di siguridad ta vigente y cu e Gobernador por sinti su mes sigur den e vehiculo.

 

Asina cu mira e auto A-1 bin, e ora ey ya sa caba cu ta Gobernador ta bin. Na aña 1985 Gabinete di Gobernador a cuminsa core cu auto Mericano pero na 1991 a cambia pa Garage Cordia, asina Walter Maduro, chauffeur di Gabinete di Gobernador a remarca. E prome auto di Garage Cordia tabata un Toyota Crown, pero despues di esey a cuminsa uza autonan Lexus di cual a resulta tremendo. “Nos a haya un Hybrid y mi ta sigur cu nos ta bay gust’e tambe. Esaki ta e prome auto nobo di Gobernador Alfonso Boekhoudt”, di acuerdo cu Walter Maduro.

 

A funda Garage Cordia Aruba na Juli 1965 ora cu a bestel e prome 12 autonan di marca Toyota pa nos isla. Awendia, despues di mas cu 50 aña, keto bay e compania tin e record di a bende mas auto den historia di nos pais, tanto como agencia como tambe e marca Toyota. Nan ta conoci specialmente pa e bon calidad di e autonan, pero sin lubida cu nan ta e unico cu tin un surtido grandi di piesa pa drecha of ora di “service” e vehiculonan.