Home Uncategorized Minister di Salud Publico, Cuido di Nos Grandinan y Deporte, dr. Carlos...

Minister di Salud Publico, Cuido di Nos Grandinan y Deporte, dr. Carlos “Alex” Schwengle Deporte di domino tambe mester sosten

SHARE

Hungadonan ta stimula nan mente durante e wega

 

ORANJESTAD, Aruba: E aña aki un biaha mas a tuma luga e campeonato di Aruba Domino Bond y durante e apertura Minister di Salud Publico, Cuido di Nos Grandinan y Deporte, dr. Carlos “Alex” Schwengle tabata presente. Tur aña cu tin e apertura Minister Schwengle ta purba di yega eynan y un biaha mas e ta logra presencia esaki. “Mi ta hopi contento. Nan tin un bunita alocacion aki na Riverplate, cu nan airco unda nan por hunga trankil sin cu ta kita nan concentracion door di otro cosnan ”, Minister Schwengle a expresa.

 

Tambe Minister ta contento di mira cu tur nan sponsornan ta yuda nan bon. “Nos ta gradici tambe e organisacion di Riverplate pa provee e luga y tambe e sponsornan cu ta haci deporte posibel” Minister Schwengle a remarca. Nan ta haya yudansa di Comision Subsidio, pues indirectamente di Minister tambe. Ta importante pa Minister ta presente eynan pa duna nan e sosten y bisa nan cu nan deporte tambe ta hopi importante. “Y e ta, aunke por ta cu fisicamente nan no ta stimula e curpa pero nan ta stimula e mente. Mi ta apoya nan 100%”, Minister Schwengle a expresa.

 

Tur aña den e luna di Mei Aruba Domino Bond ta purba di haci e apertura nacional di e campeonato di domino y e aña aki tin 9 team participante. E teamnan ta Bubali, Old Parr, Scorpion, North Starz campeon di aña pasa, Sportboys, Oakleys di San Nicolas, Extreme y Trappers. Cada team tin 35 miembro y tin casi 300 miembro di Aruba Domino Bond, president di Aruba Domino Bond, Soraida Boekhoudt a remarca.

 

“Tur aña nos ta haci’e 200 tanto pero e aña aki nos a haci algo otro. Pa motibo cu e weganan ta cuminsa 8:00pm y ta caba te den oranan di marduga, nos a bay un tipo di mundial”, Soraida Boekhoudt a remarca. Mundial ta hunga 40 minuut di domino y tin 20 minuut di descanso, p’esey Aruba Domino Bond ta bay introduci e sistema aki. “Si e wega ta cuminsa 8:00 PM, e ta 25 wega tur team tin cu hunga y pa 12:00 – 1:00 di marduga tur wega tin cu termina.”