Home Uncategorized MEP a bishita barionan di San Nicolas den entrada masal

MEP a bishita barionan di San Nicolas den entrada masal

SHARE

Candidatonan di Partido MEP ta sigui activo tur dia bishitando cas pa cas den tur bario na Aruba. Den fin di siman Lider di Partido MEP, sra Evelyn Wever-Croes, hunto cu candidatonan y sostenedornan a drenta den un forma masal den barionan di San Nicolas. Nos a scucha y tuma nota di cada preocupacion cu ta biba den cada hogar cu nos a bishita.

Cu cada bishita cu MEP a haci den San Nicolas den e ultimo lunanan pa presenta nos plan di solucion y scucha e nececidadnan di ciudadanonan di San Nicolas, nos ta keda convenci cu San Nicolas tambe kier cambio.

Insiguridad ta keda e preocupacion di mas grandi pa mayoria di San Nicolas y di Aruba completo. Mester bin un cambio completo riba e tereno di siguridad y criminalidad. Pa MEP e preocupacion aki lo wordo atendi mesora cu nos ta den Gobierno. Cu nos plan cu nos ta bin ta anunciando, nos lo trece orden y respet bek.

Un otro preocupacion grandi pa hopi ta keda tambe e pensioen di belasting. Hopi di esnan di mas edad ta conta nos con nan situacion ta y ainda riba dje ta haya nan cu cobransa di belasting. Partido MEP ta di opinion cu nos grandinan a traha duro caba, y a paga suficiente belasting caba. Una bes nos ta den gobierno, nos lo percura pa tur nos grandinan haya e trato husto cu nan merece.

Nos por bisa cu e pueblo di San Nicolas a ricibi nos den gran forma. Hopi chauffeurnan cu tabata pasa den nan auto a baha for di caminda pa saluda candidatonan y alabes plak sticker riba nan auto. Algo cu tambe tabata remarcabel ta e cantidad di peticionnan di habitantenan di San Nicolas pa nos hisa bandera na nan propiedad, mustrando asina cu no tin miedo pa mustra nan color politico.

MEP su compromiso cu Aruba ta pa pone e hende central atrobe. Hunto nos lo logra esaki. MEP lo ta drentando tur skina di Aruba cu nos mensahe di cambio. Aruba, Hunto p’e cambio! #sinmiedo