Home Uncategorized Gabinete Mike Eman II y tur stakeholder publico y priva a conoce...

Gabinete Mike Eman II y tur stakeholder publico y priva a conoce e Mapa di Implementacion di Nacionnan Uni su SDGs

SHARE

ORANJESTAD – E siman aki ta tumando luga na Aruba un encuentro importante di e Grupo di Desaroyo di Nacionnan Uni. ‘MAPS’ ta e Mision Arubiano pa Metanan di Desaroyo Sostenibel y ta forma parti di e trayecto cu Nacionnan Uni a inicia hunto cu Gobierno di Aruba pa fiha y implementa 17 meta global y bira ehempel pa resto di mundo.

Despues di varios di reunionnan fructifero caminda a traha cu hopi stakeholders local, diabierna mainta a tene un presentacion di loke ta e ‘Roadmap SDG Implementation’ cu e mesun stakeholders aki consistiendo di representantenan di sectornan publico y priva cu ta clave pa e exito di e mision. Ta trata aki di socionan for e area di salud, educacion, labor, medio ambiente y tambe asistencia social, economia y cultura.

Prome Minister Mike Eman tabata presente na apertura di MAPS y ayera tambe a haya un ‘debriefing’ hunto cu coleganan di Conseho di Minister. Previo na esaki, Premier eman a dirigi na e participantenan di e sesion cu a tuma luga den sala di Renaissance Conference Center.

Den su discurso Premier Eman a resalta e stapnan tuma te aworaki y cu ta pone Aruba na un fase mas avansa di e trayecto, pero sin kita ningun importancia for di e balor cu cooperacion entre instancianan publico y priva tin den haci di e SDG (Sustainable Development Goals) un realidad.

Specificamente Premier Eman a papia di eleva e metanan na nivel di Reino y asina dune mas realce y un cobertura mas amplio cu solamente Aruba como nacion cu Nacionnan Uni a scoge pa desaroya como bandera di e proyecto aki.

Pa mas informacion tocante e programa completo cu mision MAPS a sostene e siman aki na Aruba y e 17 Metanan di Desaroyo Sostenibel di Nacionnan Uni, bishita e pagina “SDG Aruba” riba Facebook.