Home Uncategorized Dreamer Catherine Saldaña: ‘Mi ta Arubiano, mi a nace na Aruba’

Dreamer Catherine Saldaña: ‘Mi ta Arubiano, mi a nace na Aruba’

SHARE

ORANJESTAD – Asina e hoben di 16 aña cu ta gusta pinta, baila y cu ta studia na Juliana School MAVO ta bisa. Na su edad hoben, ta dificil pa e compronde con a pesar di esey e no por tin un paspoort of ni sikiera un carchi di AZV pa bay dokter, mescos cu su amiganan; algun di cual a bin di otro pais. “Hopi hende ta kere mi ta Peruano dor di mi cara y mi Mama, pero mi ta bisa nan: No, mi ta Arubiano. Mi a nace na Aruba!”

Hopi a wordo papia y skirbi recientemente tocante e proyecto ‘Dreamers’ cu Gabinete Mike Eman II hunto cu DIMAS a introduci recientemente. Pa awo ta bon conoci cu esaki ta dirigi pa un grupo masha specifico di miembronan di nos comunidad. Hobennan cu a sea nace na Aruba of bin for di chikito y a bay scol, pero cu tempo a haya nan stroba di caba scol y como tal, no por completa nan formacion manera cualkier otro ciudadano. A continuacion e storia di Catherine:

Catherine Victoria Saldaña Castro a nace na Aruba na januari 2001. Te cu su 8 aña su Mama, di origen Peruano, a logra haya un scol dispuesto pa ricibi’e y dune e derecho di educacion. Cu ayudo di bijles, den e prome aña di scol caba, no solamente Catherine a catch up cu e klas cu ta coresponde na su edad, pero e tabata entre e miho studiantenan di su grupo. Despues di a gradua di Prinses Amalia, awo e ta siguiendo su estudio di MAVO na Juliana School.

Pero e dolornan di cabes pa Catherine y su famia no a caba eynan. Constantemente scol ta pidi su mama pa trece documentonan di su residencia legal. Despues di hopi intento y pa varios motibo, esaki no a logra. Na e cas na Tanki Leendert caminda e ta biba hunto cu dos ruman y tambe padrastro, Catherine a conta di e momento cu mas e ta lamenta di no por tabatin su papelnan regla.

Algun aña atras Elisa, su amiga, kier a celebra su aña na Disney World y el a wordo invita pa bay. Dor cu e no tin un paspoort, e no por a acepta e invitacion aki, algo cu a hacie hopi tristo. E mester a wak tur su amiganan bay pasa dushi den vakantie, mientras cu e a keda atras. Catherine: “Mi no ta compronde pasobra mi conoce amiganan cu tambe a bin di otro pais y ya nan tin nan papelnan y ami cu a nace akinan, mi no tin’e. Tin biaha mi no ta haya cu ta ‘make sense’, mi no ta compronde.”

Na scol Catherine ta biba tambe cu miedo, vooral ora e ta wak otro mucha bira malo. Por ehempel un mucha muhe cu tin epilepsia y hopi biaha ambulance ta bin scol p’e, Catherine ta bisa cu: “su mayor y su amigonan ta sigur cu e lo ta OK paso e tin un seguro, pero ami ta hopi cuidadoso pa mi no tin un man kibra of algo pa mi mama no tin mas preocupacion.”

Hustamente un di e profesionnan cu e ta pensa riba dje pa su futuro ta dokter of asistent di dokter y e lo kier bay Hulanda pa haci esaki, “pero dor di mi papel mi tin miedo cu mi no lo por sigui studia.” For di awo caba esaki ta un preocupacion cu ta biba cune regularmente, te hasta ora cu e ta na scol studiando pa un futuro cu tabata incierto.

Algun dia pasa, ora su mama a cont’e cu Gobierno a anuncia e proyecto ‘Dreamers’, el a sinti hopi contento. “Ora nan a bisa mi, mi a cuminsa grita. Mi ruman chikito a puntra mi kico a pasa. Mi a bisa cu mi por haya mi papel y tur cos ta bay ta cla,” el a conta cu un sonrisa na su cara y briyo na su wowonan.

Gobierno di Aruba a prepara un programa special pa asina conoce hobennan manera Catherine miho y compronde pakico e proyecto ‘Dreamers’ tabata uno asina necesario; no solamente pa nan, pero tambe pa henter nos sociedad en general riba termino corto, mediano y largo. E programa aki ta pasa dialuna awo 22 di mei pa 7:30 pm na ATV canal 15 y pa 9:10 pm na Tele Aruba canal 13. Tambe lo ripiti diamars 23 di mei na ATV atrobe pa 7:30 pm y na Tele Aruba diahuebs 25 di mei pa 6:00 pm.