Home Uncategorized Cu e proyecto di Uterlijk Verzorging lo tin personanan certifica

Cu e proyecto di Uterlijk Verzorging lo tin personanan certifica

SHARE

ORANJESTAD, Aruba – Openbare Avondleergangen Aruba (OAA) a cuminsa cu e opleiding di Uiterlijk Verzorging, pero pa por a logra esaki nan tabatin mester di sosten di partnernan pa asina desaroya e opleiding aki. Nan a acerca CEDHEM pidiendo asistencia pa trece clientenan pe proyecto, mientras cu for di My Secret Aruba a yuda nan cu un tecnico exclusivo pa duna les.

My Scecret Aruba ta contento y orguyoso di participa den e proyecto di Uiterlijk Verzorging y nan ta trahando hopi duro. Recien e lesnan a cuminsa y e tecnico exclusivo di My Secret Aruba Carolina Croes ta super orguyoso di su grupo pasobra apenas den un par di dia nan a mustra con interesa y contento nan ta pa loke nan ta haciendo. Den poco dianan a mira e frutonan y e participantenan ta atende 122 ora di les. Carolina Croes ta sigur cu ora nan keda cla, lo bay tecniconan profesional den mundo di beyesa of mundo di huña.

Aworaki e grupo aki ta haya tur loke tin di haber cu huña, tur loke ta cuminsa desde un basico te un tiki avansa. “Nan ta cuminsa cu medi y pedi, spa y nan lo bay caba cu sistemanan. Sistemanan di acrygel, sistemanan di acrylic, servicio na cliente, lenguahe tecnico”, Carolina Croes a remarca. Nan no ta yega djis sinta, atende cliente y haci huña, pero tambe e ta depende nan lenguahe, con nan tin contacto visual cu clientenan, con nan tin cu maneha nan momento di trabou cu clientenan. “E ta bayendo bon. Mi ta orguyoso pasobra den termino di tiki tempo, e muchanan aki a echt absorbe e tiki cu nan a siña”, asina Carolina Croes a remarca.

Centro di Desaroyo di Hende Muhe t’ey pe desaroyo di e hendenan muhe y pa cu e proyecto di e studio di Uiterlijk Verzorging, nan a hunga diferente rol pa cu esaki. No solamente pa busca e personanan cu a ricibi e tratamento pa cu dia di mama, pero tambe CEDHEM ta sostene esnan cu ta bayendo na e opleiding, asina directora di CEDHEM Sandra Brown a indica.

Duna e personanan un chens pa yega eynan y elabora, mustra kico nan por. Esey ta e yabi di CEDHEM den comunidad. “Tipo di proyectonan asina aki nos lo sigui apoya. Tambe por mira ora cu hende muhe bin na CEDHEM ta pasobra nan ta buscando orientacion”, Sandra Brown a remarca. Locual cu ta haya den e proyecto ta cu e hendenan muhe cu a acerca CEDHEM pa yudansa, nan a desaroya asina hopi y awo nan por ofrece e servicio.