Home Uncategorized Parlamentario mr. Juan E. Thijsen (MEP): Minister Arthur Dowers a presenta plan...

Parlamentario mr. Juan E. Thijsen (MEP): Minister Arthur Dowers a presenta plan nobo basa riba e mesun maneho bieuw cu no a duna resultado.

SHARE

Parlamentario mr. Juan E. Thijsen a tuma nota cu Minister Arthur Dowers a presenta un plan nobo 2017-2020 basa riba e mesun maneho bieu cu no a duna resultado.

Segun informacion den media “Minister di Husticia, mr. drs. Arthur Dowers, a hiba palabra y a splica kico tur ta e contenido den e plan di maneho nobo pa 2017 / 2020. E titular di husticia a splica cu despues cu e base a wordo poni entre 2013 pa 2017, awor lo enfoca riba e continuidad di esaki”. Esaki segun Parlamentario mr. Juan E. Thijsen ta mal noticia pa pueblo y bon noticia pa criminalnan.

E situacion riba criminalidad na Aruba ta alarmante y ta sigui alarmante. E cuidadano no tin seguridad ni riba caya ni na su mesun cas. Comerciantenan dia aden dia afo ta manera loteria, ki dia nan ta na turno. Criminalnan cada dia ta birando mas creativo y e Minister awor ta escoge pa keda haci e mesun maneho cu a fracasa e ultimo 8 anjanan.

Segun Parlamentario mr. Juan E. Thijsen criminalidad ta un di e topiconan cu mas ta ser encontra durante bishitanan di cas pa cas. E pueblo ta anhela un cambio grandi, un aire nobo den combatimento di criminalidad pa e por biba den trankilidad y cu seguridad. Ta increible di tende cu Minister Dowers no kier compronde cu su maneho a fracasa y sigur no por ser continua.

Partido MEP a desaproba su maneho varios biaha den parlamento cu un mocion di desconfianza contra di Minister di Husticia Dowers pero e Fraccion di AVP a keda sostene e mal maneho di Dowers.

Parlamentario mr. Juan E. Thijsen ta puntra su mes den tur esey unda Prome Ministro Mike Eman ta keda, e tambe ta bishita casnan na Aruba, e tambe mester ta tende e hendenan sclama pa mas seguridad. Ta con Mike Eman y AVP ta pensa di drenta e eleccion bisando cu Minister Arthur Dowers lo sigui y cu mesun maneho bieu cu a fracasa. Ta parse cu AVP y Mike Eman mes no kier bin bek den gobierno cu tanto fechoria di corupcion andando y nan kier laga e desastrenan pa MEP bin drecha.

Segun Parlamentario mr. Juan E. Thijsen ta bon pa pueblo tuma nota di e desaroyo aki riba combatimento di criminalidad y duna partido MEP un mandato cla y raspa pa bai maneha husticia riba nos pais y traha riba mas trankilidad pa e cuidadanonan, turistanan y comercio. Parlamentario mr. Juan E. Thijsen y partido MEP ta cla pa e reto. Hunto p’e cambio sin miedo.