Home Uncategorized MEP A REUNI CU DELEGACION DI NACIONNAN UNI TOCANTE ‘SUSTAINABLE DEVELOPMENT...

MEP A REUNI CU DELEGACION DI NACIONNAN UNI TOCANTE ‘SUSTAINABLE DEVELOPMENT GOALS SDG”

SHARE

ORANJESTAD — Lider di MEP Evelyn Wever-Croes y parlamentario Ady Thijsen a reuni cu representantenan di Nacionan Uni tocante e ‘sustainable development goals’, of e asina yama SDG. Aruba como pais tambe a compromete su mes pa traha riba e metanan aki, pa trese un desaroyo sostenible.

“Pa e gobierno aki medio ambiente y energia alternativo ta e puntonan cu mas ta haya prioridad. Medio ambiente ta algo hopi importante berdad, y pa por garantisa un medio ambiente sostenbile, mester bin cu e ley di medio ambiente. Tanten e ley ey no bin, ta manera carga awa hiba lama. Gobierno di AVP ta papia di cu lo tin medio ambiente na pecho, pero no a hasi nada pa protehe. Al contrario, a destrui nos medio ambiente.

Pa nos di MEP ta hopi importante pa traha un plan realistico pa logra cumpli cu e metanan. Pero contrario cu Gabinete Eman nos kier enfoca mas riba e metanan cu ta pone e ser humano central, manera e problemanan social, pobresa y hamber. Pasobra e prioridad di gobierno di AVP ta mas riba energia sostenible, den cual mayoria di e fondo ta bai, mientras ta neglisha e dolornan cu ta biba den nos comunidad.

Ta importante tambe pa indica si tin fondo pa atende cu nan, pasobra ta un hecho conosi cu e gobierno aki a crea asina tanto debe den e 8 anjanan aki y pa futuro cu e PPP-nan, cu ta hasi dificil pa e sigiente gobierno tin hopi espacio financiero pa cumpli cu e metanan aki.

Finalmente nos a expresa e necesidad pa Aruba tin data y estadistica confiable, manera na Centraal Bureau voor de Statitsitke, cu e gobierno aki poco poco a purba elimina. Mi ta contento pa tende cu Nacionan Uni lo traha cu CBS pa duna e departamento aki e forsa bek cu e tabata tin prome cu Gabinete Mike Eman a tuma over na 2009”, segun lider di MEP.

E delegacion a puntra kiko pa MEP mester haya prioridad, y lider di MEP Evelyn Wever-Croes a bisa “Pero e prioridad real mester wordo duna na e ser humano. Den ultimo 8 añanan nos a mira hopi inversion den infrastructura y embeyesemento. Pero e ser humano a wordo lubida. Ningun pais por desaroya sin cu atencion ta wordo poni na e ser humano, y pesey nos prioridad ta pa trese e balance ey bek, y pone e prioridad na e ser humano: cuido, educacion, seguridad. Esey ta nos prioridad”, lider di MEP Evelyn Wever-Croes a finalisa bisando.