Home Uncategorized EVELYN WEVER-CROES: BAN CUIDA NOS MEDIO AMBIENTE DI BERDAD! NO CU...

EVELYN WEVER-CROES: BAN CUIDA NOS MEDIO AMBIENTE DI BERDAD! NO CU PALABRA SO!

SHARE

STA. CRUZ – Den siman ta hopi hende a haya un susto ora a mira e destruccion di naturalesa na Dakota, pa e construccion di e Watty Vos Boulevard. Esaki a pasa sin anuncia, y obviamente sin un bon planificacion.

Den nomber di gabinete Mike Eman a kap hopi mata sumamente valioso pa nos naturalsa, cu ta eynan di hopi anja. Berdad nan no por a pensa un forma pa no destrui nos naturalesa?

Despues a core anuncia cu lo reemplasa nan. Tur hende sa cu e matanan ey bo no por reemplasa nunca mas.

VISION GREEN

Pero mas tristo ta cu ta hustamente e gobierno aki ta pretende di tin un vision “green”. Pero realmente kiko e gobierno aki a hasi pa nos medio ambiente? Net net nada. Solamente palabranan bunita, pero di accion, net net nada.

FALTA DI ORGANISACION

Otro cos cu ta causa hopi iritacion ta cu e gobierno aki ta hasi tur cos bruha, nan falta organisacion. Dicon no por caba cu un proyecto prome cu cuminsa cu otro? E molester cu e vierbaansweg ta causando na Pos Chikito y Savaneta, ta enorme. E trabounan ey ta leew di keda cla, anto awor ya caba ta bai cuminsa cu otro proyecto?

SOLUCION REAL, NO PALABRA BUNITA SO

Nos medio ambiente mester di atencion real, no solamente bunita palabra. Pesey MEP ta pone prioridad na e ley di medio ambiente, Sin e ley di medio ambiente, ta manera carga awa hiba lama, bo no por protehe nos naturalesa. Si e ley aki lo tabata tey, e destruccion di Rooi Frances, e destruccion di mangrovenan di Spaans Lagoen ni e destruccion den Dakota lo por a pasa sin consequencia. E ley aki lo haya prioridad bou di un gobierno di MEP.

“Den e ultimo añanan nos a mira mas tanto inversion den proyecto di infrastructura grandi, mientras e camindanan den barionan mes a wordo neglisha. Locual ta mas tristo, e ser humano tambe a wordo lubida. Ningun pais por progresa si bo neglisha su hendenan. Pesey MEP lo trese un balance den e inversion den infrastructura, y den e ser humano. E ser humano lo haya prioridad, y e infrastructura den barionan lo haya prioridad”, segun Evelyn Wever-Croes.