Home Uncategorized Prome Minister Mike Eman SDG-nan ta metanan cu ta haci un diferencia...

Prome Minister Mike Eman SDG-nan ta metanan cu ta haci un diferencia pa tur bibando na Aruba

SHARE

ORANJESTAD – E siman aki ‘United Nations Sustainable Development Goals Planning Mission’ ta tumando luga na Aruba. E mision ta un cooperacion entre Nacionnan Uni y Aruba, pero ta parti tambe di e vision cu Gobierno lidera pa Prome Minister Mike Eman tin pa traha na crea sectornan sostenibel pa nos sociedad. Di e forma aki Aruba hunto cu partnernan di diferente sector ta yuda trata y crea puntonan cu mester traha riba dje pa yega na implementacion di Metanan Mundial pa Desaroyo Sostenibel (SDG) di Nacionnan Uni na Aruba.

E commission di Nacionnan Uni (Scenario Building Team) lo yuda Aruba crea e caminda pa Gobierno, comunidad y organisacionnan di Aruba pa traha hunto y yega na un isla sostenibel economicamente, socialmente y den medio ambiente pa 2030.

E reunion tumando luga actualmente na Aruba ta un “follow up”di loke a keda dicidi den e Asamblea di Nacionnan Uni di 2015 den cual Prome Minister Mike Eman a participa y durante e reunion ey e metanan di SDG a wordo adopta pa henter Reino Hulandes. “Aruba cu orguyo y cu un sentido fuerte di compromiso a forma parti di e momento importante aki ora cu mundo a bini hunto pa tene na consideracion e retonan cu nos ta enfrentando y unda cu mundo a wordo pidi pa traha hunto riba 17 meta. Na 2030 ora cu nos mira bek, nos por bisa cu nos tur a haci lo maximo pa Avanza riba e 17 metanan ey,” Prome Minister Mike Eman a bisa na inicio di e prome reunion di e commission.

E mandatario durante e evento aki a recorda cu den diferente panel y eventonan na cualnan e tabata invita pa participa den discusion- y forumnan riba e SDG-nan, el a menciona cu e metanan aki tin algo hopi unico, cu ta nan forsa pero tambe ta nan debilidad. “Si bo mira e 17 metanan y nan objetivonan, ta cosnan cu nos tur ta preocupa pa nan. Bo lo pensa cu e 17 metanan ey, cu nos tur ta kere den nan, mester por wordo realisa. Pa e ultimo siglonan, ya caba tabatin preocupacion pa pobresa, conservacion di naturalesa, pero ora cu a haci un evaluacion di con leu nos a yega den transcurso di añanan, nos por mira cu riba diferente tema tin asina hopi mas trabou pa wordo haci. Aunke cu e metanan ta asina cla y tin apoyo di tur hende, ainda nos ta canando atras. Den nan forsa, tin tambe nan debilidad. Pa un motibo of otro nos no ta haci lo suficiente como comunidad mundial pa avansa riba e metanan en cuestion.”

Ta pa e motibo di e forsa y alabes debilidad den logra e metanan ey, e reunion tumando luga na Aruba ta un momento importante pa e comunidad Arubano señala cu nan kier ta parti di un team cu den un forma mas consistente, organisa y strategicamente pa avansa riba e 18 metanan importante di Nacionnan Uni. Prome Minister Eman a comparti su experencia den su bishita na Hulanda, unda cu el a combersa cu 4 lider politico cu probablemente lo forma e siguiente coalicion di e Gobierno nobo di Hulanda. Den e combersacionnan ey a discuti diferente topico cu for di e perspectiva Arubano ta puntonan cu mester forma parti di e plataforma di e Gobierno nobo di Hulanda. “Un proposicion specifico cu nos a haci ta pa tuma e SDG-nan y haci nan un punto di enfoke nobo den Reino Hulandes. Hopi biaha nos ta mira cu den Reino ta atende temanan solamente ora cu nan bira un problema of ora cu surgi polarisacion rond di cierto tema. Nos no tin un agenda cla pa Reino Hulandes completo. Y cu tin e metanan comun cu por inspira nos tur y crea un calidad di bida pa tur e paisnan den Reino. E temanan di SDG a wordo bon ricibi door di e lidernan politico. Mi ta spera cu den e siguiente programa di Gobernacion di Hulanda, ta aparece un paragraaf dedica na e SDG den e contexto di ta punto di enfoke nobo,” Eman a bisa den su discurso.

Tambe Prome Minister Eman a enfatisa cu Aruba no por logra e obhetivonan SDG su so. Pa esaki mester di cooperacion den Reino y pesey tambe ta tumando luga e reunionnan preparatorio di Nacionnan Uni awor na Aruba.

Den un tono di hopi orguyo Prome Minister Eman a papia di tur loke Aruba a logra practicamente riba su mesun forsa, pasobra nunca e isla a haya e ayudo financiero manera cu a sosode cu otro islanan den Reino Hulandes. “Tur loke nos haci riba e isla chikito aki, nos ta hacie riba nos propio esfuerso, inclusive e meta poni pa yega na un presupuesto balansa y superacion di e crisis financiero mundial cu a afecta pa nos.” Y ta e esfuerso ey mes ta pone cu Aruba ta traha pa logra e 17 SDG-nan adopta door di NU.  E ta metanan cu ta haci un diferencia pa tur esnan bibando riba e isla.