Home Uncategorized Participante di Hackathon Oranjestad, Marisol Sanchez: ‘Si tur idea materialisa, por añadi...

Participante di Hackathon Oranjestad, Marisol Sanchez: ‘Si tur idea materialisa, por añadi na loke tin aworaki na Caya Grandi’

SHARE

ORANJESTAD – Marisol Sanchez ta un hoben, kende a forma parti di e grupo ‘CGI: Caya Grandi Innovations’ cu a participa den fin di siman na e ‘Hackathon Oranjestad.’ E grupo no a bay cu e premio maximo, pero si a bay cas cu e satisfaccion di un bon experiencia y un comprondemento mas cla di con por soluciona e retonan di actividad comercial den Caya G.F. Betico Croes.

Pa loke ta e actividad riba su mes, Marisol a splica cu ‘e tabata un experiencia hopi great. Por ta hopi hende tin idea, pero ora bo echt sinta dos dia ta enfoca riba esey, bo ta bira mas specifico. “E idea aki ta ‘doable’ of e no ta ‘doable’? y bo ta traha mas enfoca y esey nos a experiencia e ultimo dos dia aki.” Na su opinion, “e tabata definitivamente ‘hopi great’, e tabata un bon experiencia. Tur hende cu por tin oportunidad di participa, mester haci’e y den e caso aki, vooral algo cu bo por duna bek na bo isla.”

Sanchez a splica cu el a yega na e conclusion cu tin hopi idea y tin hopi solucion di loke a ripara; y hopi di e ideanan ta cosnan cu por a wordo haci conhuntamente. ‘Imaginabo si tur e teamnan aki en berdad tur nan idea por materialisa, con hopi mas por añadi na loke cu tin aworaki na Caya Grandi.’

Hackathon Oranjestad ta un iniciativa di Ministerio di Asuntonan Economico hunto cu Bureau Innovatie, KvK y VNO cu a join pa facilita y ehecuta e evento. Minister mr. Arends a duna di conoce cu e siguiente paso lo ta pa registra y implementa e idea ganado, pero cu tur cinco idea tin atencion di Gabinete Mike Eman II.