Home Uncategorized Un tremendo ‘Siman di enfermeria’ yena cu actividad

Un tremendo ‘Siman di enfermeria’ yena cu actividad

SHARE

ORANJESTAD, Aruba – E siman di Enfermeria tabata un siman di hopi actividad. Diabierna 12 di mei, ‘Dia di Enfermeria’ tabata e culminacion di e siman aki. A cuminsa e dia aki cu un desayuno tradicional unda cu tur empleado por a busca nan desayuno den cafetaria y sinta hunto un rato of hiba esaki na nan departamento pa come hunto cu coleganan. Manera ta custumber e cuminda cu e tremendo coleganan di cushina a traha for di marduga a wordo sirbi door di miembronan di staf. Tur colega a wordo felicita pa e dia aki door di e comision di siman di enfermeria y Hunta di Directiva di Hospital. E dia aki a wordo clausura cu un tremendo anochi di ‘bowling’ cu diferente premio na e ganadonan.

Miembro di Hunta di Directiva sr. Ezzard Cilié ta conta cu e comision di siman di enfermeria tabata creativo y a haci bon trabou pa logra un siman hopi leuk unda cu tur actividad a wordo bon atendi. E ambiente dushi y positivo aki ta crea mas union di coleganan, sr. Ezzard Cilié a remarca. Enfermeria tin su retonan y nan merece un celebracion unda cu por gradici nan pa e trabou duro cu nan ta haci.

A habri e siman cu un ceremonia oficial sigui pa un exposicion na e entrada unda cu por a mira e historia di enfermeria y e diferente tipo di enfermeronan cu tin rond mundo, di antes y awo. A clausura e prome dia cu e wega popular ‘Mens erger je niet’, cu tabata super bon atendi y tur hende a pasa masha bon mes.

Diamars  miembronan di e comision di Siman di Enfermeria a haci entrega di ‘e regalo’ na e diferente piso y departamentonan. Aña pasa nan a entrega esaki personalmente pa prome biaha y e feedback cu nan a ricibi ta cu nan a aprecia cu e comision a tuma e tempo pa entrega e regalonan y felicita nan pe bon trabou cu nan ta haci tur dia. Ademas, tabatin diferente lezing y tayer cu tabata bon atendi y hasta un Zumba class na Linear park. Pa relaha coleganan por a disfruta di massage y tambe siña di e workshop aromaterapia. Diahuebs a otorga e premio di innovacion unda cu nan a saca e ganado di e miho idea innovativo di cuido. Intencion ta pa despues implementa esaki den hospital. Algo cu no tabata falta tabata e competencia di drechamento di cama cu tur hende a haya tremendo.

“E siman di enfermeria semper ta hopi leuk y nos ta haci diferente cos riba afdeling, por ehempel dorna afdeling. Bo ta sinti e aprecio pa nos como personal di enfermeria, como tur persona den cuido. Naturalmente e competencia di drecha cama ta algo cu ta trece e team hunto”, enfermera Anette Kelly-Wester a remarca. Pa e competencia di drechamento di cama, desde mainta e enfermeronan a cuminsa train riba e afdeling, unda cu nan a drecha tur cama y tabata algo ‘fun’ henter dia.

“Tur esunnan cu kier drenta enfermeria, specialmente esunnan hoben, bin yuda nos cuida e pashentnan. E vak di enfermeria ta algo hopi bunita, pasobra bo ta haci algo pa hendenan cu no por y e tin su banda di recompensa cun’e cu ta duna bo hopi satisfaccion como persona”, asina Anette Kelly-Wester a remarca.

 

Durante ful e siman tambe coleganan por a saca potret riba e diferente piso cu tabatin nan photobooth bon ekipa. A decora na diferente pais pa simbolisa e diferente cultura den Hospital cu ta traha hunto. A drenta hopi potret masha leuk y e ultimo dia a entrega premionan personalmente pa esunnan cu a gana.

Por a mira bek riba un tremendo siman yen di actividad unda cu tur empleado di Hospital hunto a disfruta y celebra e trabou cu nan ta eherce tur dia.