Home Uncategorized Representante di Craft Beer Festival, Indy Chan: “Mas bendedo lo participa den...

Representante di Craft Beer Festival, Indy Chan: “Mas bendedo lo participa den e Craft Beer Festival”

SHARE

ORANJESTAD, Aruba – E aña aki un biaha mas lo tin e competencia di Craft Beer Festival y e lo tuma luga dia 19 di Mei proximo y pa ful e fin di siman. Representante di Craft Beer Festival, Indy Chan a indica cu e competencia lo inicia diabierna na Renaissance Hotel, unda cu na e Blue Bar lo cuminsa cu e happy hour.

Despues di e happy hour na e Blue Bar, lo sigui un 3 course dinner na L.G. Smith’s Steak & Chop House y aki nan lo tin un combinacion cu e cerbesnan aki. E lo bay ta un experiencia unico caminda cu e chefnan a traha menunan specifico cu lo bay ta un combinacion cu e cumindanan. E aña aki tin varios bendedo lo participa, di cual tin bendedo di aña pasa y tur a expande. “Kiermen Craft Beer ta un movecion cu ta creciendo. Nos tin hopi mas cerbes compara cu aña pasa, nos tin cerbesnan cu specialmente nos a busca pe evento aki. E lo bay ta un experiencia unico”, Indy Chan a remarca.

E Craft Beer Festival lo tuma luga na Renaissance Convention Center y e biaha aki nan lo incorpor’e paden di Convention Center unda cu lo tin e Craft Beer Festival mes. E parti pafo, na e Renaissance Garden, lo bay tin e Craft Beer Inspire Food Festival. Entrada pa e Craft Beer Festival ta 25 florin prebenta y na porta e prijs ta 35 florin. “Esaki ta inclui e experiencia unico cu 1 bes pa aña bo experiencia esaki. Nos lo bay tin premio di Little Switzerland, unda cu nan ta bay duna un holoshi. Kiermen tur persona cu yega prome cu 9:00 lo ta participando pe premio aki”,Indy Chan a indica.

E inspiracion pa bin cu un Craft Beer Festival a cuminsa door di biahando afo, a mira e cultura di craft beer y esey ta algo cu nan ta purbando di trece aki na Aruba. Eynan por mira cu companianan chikito independiente ta haciendo nan best den loke nan gusta, den e caso aki trahando cerbes, experimentando hopi pa saca cerbesnan unico y e aparte cu nan a gusta ta cu tur hende ta traha hunto. Esey ta algo cu nan kier trece pa Aruba y nan ta purbando di haci esey mas local cu ta posibel. Nan kier inspira hende pa haci esey, negoshinan chikito, bay dilanti trahando hunto. Esaki ta un di e motibonan cu representantenan di Craft Beer a partner cu Balashi, cu ta e Brouwerij Nacional di Aruba.

“Nos ta hopi orguyoso di e Brouwerij cu ta traha nos cerbes localmente pa asina nos por brinda esaki na nos turista y nos local mes”, Indy Chan a remarca. Representantenan di Craft Beer ta invita pueblo di Aruba pa bay disfruta di e Craft Beer Festival y pa no laga niun hende conta otro con bon e tabata. E ticketnan por haya nan na Brosen Beer on the Rocks, Local Store, Site Bar, Shon Geco y Pos Chikito Rom Shop pa asina bo por sigura bo entrada pe Craft Beer Festival.