Home Uncategorized Otmar Oduber E Forsa Nobo (POR): Ta lamenta cu gobierno a para...

Otmar Oduber E Forsa Nobo (POR): Ta lamenta cu gobierno a para proyectonan pa desaroya San Nicolas den e Cultural Heritage City

SHARE

Recientemente Otmar Oduber Lider di Partido Pueblo Orguyoso y Respeta (POR) hunto cu miembro di e partido Curtis Fraser, a reuni den Mainstreet San Nicolas pa expresa nan preocupacion como cu mucho no ta wordo haci pa e Cultural Heritage City. Bou di e vision y maneho di Sr. Oduber cantidad di trabou a wordo haci pa drecha San Nicolas. Sinembargo hopi otro proyectonan a wordo poni “on hold” desde su retiro y hopi otronan a keda sin wordo ehecuta.

 

Carubbian

Carubbian tabata un di e festivalnan di mas exitoso aki na Aruba cu a tuma luga pa un periodo di mas o menos 5 aña. Awo ta bay bira 7 luna cu no a mira Carubbian, a compronde cu e board a wordo cambia. E evento tabata tuma luga den centro di San Nicolas y tabata trece Aruba completo hunto na San Nicolas tur diahuebs. Carubbian tabata atrae turistanan tambe y eventualmente el a bira un manera pa promove bishitante pa bin San Nicolas, cual tabata e plan for di principio pa e Cultural Heritage City.

 

Renobacion/restauracion

Como parti pa atrae hende Pariba durante dia pa fomenta desaroyo economico, a cuminsa traha riba diferente atraccion entre otro Cosecha, apertura Museo Industrial (Water Toren), sigui pa Nicolaas Store cu mester a continua pero a keda para. A pesar cu a laga fondo atras pa continua cu e proyecto, nada a wordo haci mas desde november. Decisionnan asina ta boycotea e oportunidad cu San Nicolas por tabatin pa trece fluho di bishitante den e area, sabiendo e retonan cu tin pa haya taxi y tourbus pa bin Pariba. Otro proyectonan laga cla pa ehecuta ta encera dos arte publico ambos di artistanan local, uno di e wega di domino na entrada di San Nicolas pa reconoce e wega cu a wordo hunga hopi den e bario y tambe e estatua di Lolita cu ta brinda homenahe na e dama trahado y luchado. Un estatua cu ta cla y na Aruba warda den caha den un “warehouse”.

 

Cultural Heritage City

Henter e proyecto pa haci San Nicolas un Cultural Heritage City no ta algo cu ta bisa awo, of ta plannan pa awo. Tabata bezig cu e proyecto aki ya 3 aña caba y a biaha y analisa diferente concepto. Despues cu a mira e interes cu tin pa desaroya San Nicolas, a cuminsa cu e proceso pa unifica departamentonan, instancianan publico/priva, comerciantenan, operadornan di museo entre otro, 17 miyon a wordo inverti den e proyecto. Tabatin hendenan cu desde principio a kere den e proyecto y te hasta a haya inversionistanan di sector priva cu a cuminsa cumpra edificio.

 

Lanta y involucra comunidad di San Nicolas

Curtis Fraser a splica di e concepto cu tabata bezig cu ne pa envolvi hendenan di San Nicolas den nan bario, “pop-up kitchen” ta un di e conceptonan. Un ehempel ta cu lo a stimula un persona cu ya ta cushina dushi cuminda, yude y mustre con e por setup su mes sirbi bishitantenan den un area na su cas y asina genera entrada. Asina e meta tabata pa crea oportunidad pa hopi hende di San Nicolas haya algo di haci.

 

Proyecto di arte den San Nicolas

“Wekulcha”, pinta riba un di e murayanan na San Nicolas tabata un proyecto di nos muchanan. Cantidad di hobennan artista di Aruba a traha hunto, sinembargo tur esaki tambe a para. Art Fair a tuma luga aña pasa unda cu artistanan local y internacional a pinta e bunita edificionan den caya na San Nicolas. Acuerdonan a wordo haci pa pone luz na e murayanan pa hende por admira e obranan, pero atrobe ta constata cu nada a wordo haci. Si sigui admira San Nicolas, por tuma nota di e bankinan tambe cu a wordo dorna cu arte di mosaic, cu ta duna un toke unico.

 

Wi-fi

E solar tree cu tin instala actualmente tambe a keda parcialmente ehecuta, falta e solar pannels pa bin riba dje ainda. Banda di esey lo a pone plug pa recarga telefon por ehempel y e area lo a haya wifi gratis, a reuni cu Setar y a haci diferente acuerdo. Esaki tambe ta un proyecto paga cu no a sigui. E intencion su tras ta pa crea un multitud di hende/hoben cu por reuni eynan. Esaki ta conecta bek cu e otro actividadnan y negoshinan cu tin den caya como ya tin hende den caya pa haci uso di diferente servicio cu ta conecta bek cu nos cultura y herencia.

 

Danki na nos aeropuerto a logra dispone 1.6 miyon Florin aña pasa pa cuminsa cu renobacionnan na e biblioteca. No tabatin fondo pa drecha e biblioteca y asina saca placa di ganashi di aeropuerto obteni danki na turismo. A haci esaki pa educacion di nos muchanan.

 

Finalmente ta ripara cu e di dos fase cu ta Mainstreet tambe a wordo laga atras mientras cu a laga tur cos cla. E compania a haci tur e diseño/pinturanan, fondo a wordo prepara pa na 2018 cuminsa (e ta den presupuesto). Un djis ta drenta juni y ainda no ta mira ningun preparacion tuma luga. E pregunta ta keda, dicon gobierno no kier continua cu e proyecto grandi aki.