Home Uncategorized Minister di Enseñansa, Michelle Hooyboer-Winklaar Aruba como modelo escohi pa conferencia internacional...

Minister di Enseñansa, Michelle Hooyboer-Winklaar Aruba como modelo escohi pa conferencia internacional di Conscious Discipline

SHARE

11 país presente pa conferencia di 1 siman 

 

ORANJESTAD, Aruba – Recientemente a inicia e programa di 1 siman largo di Conscious Discipline, un training rond di un sistema cu na varios scol ta conoci. Nan ta enfoca riba e desaroyo social, emocional di e studiantenan, Minister di Enseñansa y Famia, Michelle Hooyboer-Winklaar a indica.

 

Por mira esaki como un manera pa acerca diferente reto cu nan a haya cu e muchanan den klas. Na luga di straf of straf disciplinario, esaki ta un sistema cu ta laga e muchanan mes refleha riba nan comportacion. Tambe ta duna nan e espacio pa expresa kico a trece nan na e caminda akinan y pa yuda nan procesa hopi di e emocion cu nan ta sinti. Asina aki por surpasa e reto aki. “Hopi biaha nos ta pensa riba e disciplina, nos mester straf, nos mester disciplina, pero e no ta algo cu nos ta mira cu eigenlijk e tin su efectonan duradero pasobra e ta simplemente e momento ey y asina mes e mucha ta bay bek den su patrono”, Minister Hooyboer-Winklaar a remarca.

 

E no ta algo cu ta keda pega den e mente di e mucha cu si e haci esaki, e ta haya straf atrobe. “Bo sa cu esey pa mayoria mucha no ta funciona y den klas e ta mesun cos.” E programa Conscious Discipline ta algo cu dokter Becky Bailey a desaroya, kende ta un psicologo. El a pensa riba e parti con pa drenta e mucha su mundo, pero asina mes e maestro of mayor tambe tin cu sinti un parti di dje y pa por yega na un caminda unda cu tur 2 ta yega y comunica cu otro pa asina tur por compronde e stapnan cu mester tuma pa surpasa e reto aki. Minister Hooyboer-Winklaar ta kere ta e poder di e sistema aki ta cu e no ta un cu ta impone riba un otro, sino e ta cu tur 2, esta maestro-studiante, mayor-mucha ta bini hunto pa resolve kico por a sosode.

 

Hopi biaha ta mira muchanan cu muchanan por yega otro via e sistema akinan. “E tin un poder hopi grandi, e tin un impacto hopi grandi. For di hopi aña caba via dokter Helen Guda nos a conoce e sistema aki, a inverti den dje y pa nos por ricibi esunnan cu a desaroya esaki, esey ta trece na un otro nivel tambe pa tur esunnan cu a presenta aña pasa y atrobe e aña aki”, Minister Hooyboer-Winklaar a remarca. Gobierno ta hopi contento cu esaki. Ministerio a paga pa cierto di e cuponan den e training aki.

 

Biaha pasa e tabata completo, pero e biaha aki tabata 1 cupo so pasobra nan a haci’e internacional cu tin otro personanan cu ta di 10 otro pais cu ta aki nan. E ta algo cu nan a mira ta hopi internacional y Ministerio di Enseñansa ta mira cu Aruba un biaha mas obviamente ta un caminda perfecto e tipo di programanan asina aki.

 

Ministerio di Enseñansa ta hopi contento pa haci e tipo di programanan aki y nan ta contento di ta e anfitrion e aña aki. Esaki sigur lo bay ta algo cu pe siguiente añanan y nan ta mira cu por haci hopi mas riba dje y na final di dia cu tur scol di Aruba por tin e, compronde kico e ta, con pa traha y maximalisa for di dje. “Mi ta kere cu esey ta un meta cu nos tur lo kier pone nos dilanti”, Minister Hooyboer-Winklaar a expresa.

 

E programa Conscious Discipline no ta solamente pa maestronan, pero tambe ta pa mayornan tin e habilidad pa haci uzo di e materialnan aki, tambe tin diferente material disponibel. Tin algun scol cu a introduci esaki pa asina mayornan compronde loke cu ta haci na scol y nan tambe por haci algo na cas, pues hunto e triangulo ta un formula impactante pa studiantenan, specialmente esunnan cu ta enfrenta cualkier reto den comportacion y nan ta mira cu esey tin su efectonan hopi grandi.