Home Uncategorized Diaranson ultimo APA a atende 4 barco crucero cu a trece...

Diaranson ultimo APA a atende 4 barco crucero cu a trece rond di 11 mil bishitante crucero pa Aruba

SHARE
DCIM100MEDIADJI_0041.JPG

ORANJESTAD – Diaranson ultimo tabata un bes mas un dia hopi special, muestra di e exitoso maneho di APA conhuntamente cu ATA, ora cu Aruba su puerto na Oranjestad a ricibi 4 barco crucero riba e mesun dia. E prome dos barconan a drenta di mainta trempan caba y di tres rond di 8’or y e ultimo a drenta rond di 12.30 di merdia cu a haci cu tabatin 4 barco mara  na mesun momento. Ta trata aki di Carnival Vista di Carnival Cruises, Adventures of the Seas di Royal Caribbean Cruise Lines, Maasdam di Holland American Lines  y Zenith di Pullmantur Cruises.

E barconan aki a trece mas o menos 11 mil bishitante pa Aruba. Adventure of the Seas y Carnival Vista ta ser considera como barconan grandi como cu cada uno ta mas di 300 meter largo. A mara e barconan aki na wafnan B y C. Maasdam y Zenith ta barconan mediano cu un largura di mas o menos 200 meter y a mara uno den basin y e otro na e waf na unda antes tabata baha e containernan
Adventures of The Seas a trece casi 3500 bishitante mientras cu Carnival Vista a bini cu algo mas di 4500 bishitante,mientras  cu e dos barconan mediano hunto a trece rond di 3 mil bishitante crucero. “Mayoria biaha cu e barconan drenta nan tin un ocupacion di casi 100% y tin algun biaha esta ta surpasa e capacidad maximo tambe. Segun Humphrey Tromp, Director Suplente di Aruba Ports Authority,  e record den e cantidad di bishitantenan crucero ricibi riba un solo dia tabata un poco mas di 12 mil, na luna di maart, 2016. Pero e no tabata 4 barco mara den forma simultaneo den waf di Aruba. E tempo ey mester a laga un sali pa un otro por drenta y tabata trata di 5 barco.”

Maske cu e mudamento di e operacion di carga ta completamente tras di lomba y tin kisas espacio pa crea mas waf no ta bay amplia e infrastructura pa cu esaki por lo pronto. APA ta bay inverti si den e mehoracion di e diferente wafnan pero tambe den construccion di algun bolder y compra di fender nobo mirando cu e barconan ta birando mas grandi cada aña. Mayoria di e boldernan actual tin un capacidad di 70 ton, mientras cu exigencianan pa e barconan grandi ta di entre 100 te cu 200 ton. Mester tene cuenta, Tromp ta splica, cu mirando cu e barconan ta birando mas grandi y cu mas capacidad mester sigui mehora e facilidadnan y sigui traha riba un servicio optimal na momento cu e pasaheronan baha aki na Aruba, entre otro mester percura pa tin suficiente taxi disponibel pa evita cu e bishitante ta keda para mucho largo den fila pa haya  transporte. “Mi no ta bisa cu tin escases di taxi, pero como cu no ta tur taxi tin acceso na waf y door di e congestion den trafico ta trece cu ne cu tin cierto momento cu no tin taxi disponibel.

APA conhuntamente cu ATA continuamente ta adapta nan maneho pa cumpli cu expectativa di e companianan crucero pero tambe cu e bishitantenan. A base di e projecion y cifranan actual te cu april 2017 tur cos ta mustra cu den aña 2017 Aruba lo surpasa e cantidad di 700 mil turista cu ta mas cu e cantidad ricibi aña pasa. Si nos logra esaki, e lo ta un record. E cantidad mas hopi ricibi te cu awor ta di 688.500 na aña 2013. Te aworaki e cantidad cu a proyecta pa luna, basa riba e reservacionnan haci pa cada barco crucero, ta indica cu e aña aki lo ta 4% miho cu aña pasa y ta cuadra cu locual tin proyecta. Si e sigui manera te cu awor, e lo surpasa e cifra di 700 mil.

APA ta sumamente contento, Tromp a bisa, pasobra recientemente a haya confirmacion for di Royal Caribbean Cruise lines cu na mei, 2018 un di nan barconan esta “Freedom of the Seas” cu ta cay den e categoria di Freedom Class, lo cuminsa bishita Aruba. Pa por a logra haya e barco aki bin Aruba mester a demostra na Royal Caribbean cu e loodsnan di APA por drenta un barco asina sin cu mester haci adaptacionan na e kanaal na Playa. Pa e motibo aki recientemente 3 loods di APA a bay na un centro di simulacion na Fort Lauderdale na unda nan por a simula cu nan ta drenta e barco aki den waf di Aruba cual a bay sin problema. Tambe APA ta den combersacion cu e compania crucero pa den e proximo añanan, rond di 2020, por ricibi e barconan di Oasis Class, cu ta e barco crucero di mas grandi actualmente cu ta transporta rond di 6 mil pasahero. Pa esaki lo mester haci algun inversion adicional pa locual ta e kanaal pero tambe na e waf na unda tabata baha container antes pa asina por mara e barco grandi aki eynan.

Aruba keto bay ta un destino hopi gusta, pero nos mester keda brinda e miho servicio posibel y keda mehora, actualisa y renoba nos producto. No por para keto.