Home Uncategorized Awe nochi ta saca ganado di Hackaton E miho idea pa mehora...

Awe nochi ta saca ganado di Hackaton E miho idea pa mehora comercio den Caya Grandi lo bay cu e maximo premio

SHARE

ORANJESTAD – Ta reina un entusiasmo grandi bou di e 6 grupo di participantenan den e evento di Hackaton cu a cuminsa diabierna mainta y ta finalisa diasabra atardi. Hackaton ta un idea cu ta wordo ehecuta door di Ministerio di Asuntonan Economico di Minister Richard Arends hunto cu Bureau Innovatie (BI), Camara di Comercio y representacion di Hulanda na Aruba VNO.

“Nos tin un grupo varia cu ta participa den e evento aki, cu na final lo saca un ganador. E participantenan ta hobennan studiante, profesional y comerciantenan. Nos ta spera di haya ideanan hopi inovativo, mirando e participantenan,” Marlon Kock di BI a comenta diabierna den oranan di atardi. E ta fungi como mentor pa e participantenan y ta yuda cu cualkier pregunta cu por tin.

E participantenan a wordo motiva di por contribui cu pensamento di por yuda comercio den caya grandi yega na un otro nivel, y cu lo yuda trece tanto local como bishitantenan den e Centro di Compras na Playa. E idea tras di Hackaton ta pa den grupo participantenan ta sinta pensa, bin cu idea y consecuentemente cu un propuesta concreto como solucion di un reto.

E hackathon a cuminsa diabierna mainta y ta finalisa diasabra anochi ora cu e ganado, cu su idea a wordo presenta dilanti un panel di Huez, wordo anuncia.

Marisol Sanchez ta un profesional hoben cu tin apenas 2 aña cu a finalisa su estudio. Asina cu el a tende di e idea di Hacketon, el a aserca su amigonan di estudio pa mira si nan ta interesa pa participa y contribui cu ideanan inovativo cu por mehora comercio den caya grandi. “Nos a concentra nos pensamento y sugerencia riba riba e concepto di ‘sharing’. Esta comparti diferente tipo di idea y forma di traha entre e comerciantenan. E lo por conduci na un mehoracion di e forma di haci comercio den Caya Grandi,” Sanchez a bisa.

Hackaton ta tuma luga den edificio ‘The Vault’, situa den Steenweg, Oranjestad.