Home Uncategorized Parlamentario mr. Juan E. Thijsen (MEP) : AVP cu show di...

Parlamentario mr. Juan E. Thijsen (MEP) : AVP cu show di scucha 1000 voz net prome cu eleccion y durante gobernacion ta neglisha pueblo di 100.000 voz

SHARE

Parlamentario mr. Juan E. Thijsen a tuma nota di un campanja di AVP 1000 voz awor net na porta di eleccion. Esaki segun Parlamentario mr. Juan E. Thijsen ta un puro show pa gana voto especialmente bao hubentud y esaki posiblemente ta sugeri pa conseheronan di campanja di AVP mirando cu un di e criticanan mas grandi contra AVP ta e hecho cu nan ta goberna sin tene cuenta cu opinion den e comunidad. E experiencia aki a ser biba den carni y weso pa gremionan cu a worde malamente usa pa e gobierno di Mike Eman. Ora tabata mester pa pasa medidanan a usa e instrumento di dialogo social pero ningun dialogo social no a worde yama ora di regla contract di hedging, parti terenonan etc. Pio ainda gobierno no ta scucha ni instancianan constitucional manera Raad van Advies y Algemene Rekenkamer. E proceso di scucha pueblo segun Parlamentario mr. Juan E. Thijsen mester ta un proceso continuo y no algo pa net prome cu eleccion. Sigur no mester ta un scuchamento di 1000 persona lagando interes di 100.000 voz den aire sin conta cu nan. Si bo mira full e set up di e projecto di 1000 voz di AVP bo ta mira claramente un wega di mercadeo na unda ta mal usa bon intencionan di hobenan. E projecto di 1000 voz a ser devalua pa e propio voceronan di AVP kendenan a bisa cu loque pueblo kier ta luz, asfalt y klinkers y cu ta esaki ta loque pueblo ta pidi durante bishitanan di Mike Eman na casnan. Segun Parlamentario mr. Juan E. Thijsen durante bishitanan na cas durante full e anjanan cu a pasa y actualmente su persona y otro coleganan di partido ta scuchando otro tipo di problemanan y deseonan. Criminalidad cresciente, poder di compra malo, desempleo y falta di trabao, inseguridad di trabao, salubridad publico y cuido medico malo, problemanan den educacion etc ta topiconan cu ta ser scucha henter ora.

Voz di pueblo vox populi segun Parlamentario mr. Juan E. Thijsen ta hopi importante y pesey partido MEP tin su lidernan di bario cu constantemente ta den contacto cu pueblo y ta ser scucha continuamente y no ora di eleccion so manera AVP ta bin pretende cu su show di 1000voz. Pueblo di Aruba por conta cu durante gobernacion di MEP e oido lo tey pa pueblo y ta respeta tur partnernan social y instancianan constitucional. Democracia bao MEP ta hala rosea liber y ta e base pa goberna.