Home Uncategorized MetaCorp a start cu “MetaFit” pa tur su empleadonan

MetaCorp a start cu “MetaFit” pa tur su empleadonan

SHARE

ORANJESTAD, Aruba – Diasabra anochi MetaCorp a ranca sali cu e programa MetaFit cu e compania ta organisa pa hopi aña caba, pa tur e empleadonan di su subsidiarionan. A cuminsa cu competencia di bowling. Diasabra anochi MetaCorp tabatin nan competencia di “Regular Games” pa tur compania resortando bou di MetaCorp y esaki ta un evento di 2 dia, mientras cu diasabra awor 13 di mei nan lo tin e “Fun Games” cu 3 wega e anochi ey.

Basa riba e puntonan di e Regular Games y e Fun Games, lo scoge e campeon. “Team nan ta MetaCorp mes y tambe nos tin ATCO Concrete, ATCO Aruba, EcoTech, EcoGas, New York Laundry, The Cinemas, Tropical Bottling, Brouwerij Nacional Balashi, Renaissance Hotel & Casino. Ta un total di 10 compania,”, asina Lily Krozendijk a conta. E prome anochi e entusiasmo entre e participantenan tabata grandi y e empleadonan ta spera semper den e luna di Mei pa e actividadnan di MetaFit cuminsa.

“Asina cu nos a reparti e flyer cu e fechanan confirma y di biaha bo ta mira cu e companianan a organisa nan trainingnan. Nan a cera gruponan basa riba e reglanan cu ta stipula pa e competencia aki. Cada team mester tin 8 hungado, pero e entusiasmo ta basta grandi”, Lily Krozendijk a enfatisa. Durante e actividad tabata tin basta empleado presente y famia pa apoya y e ambiente tabata hopi bon. Tabatin compania cu a uni, pasobra tabatin compania mas grandi cu otro.

Tur compania ta entusiasma pa participa, Crystal Casino ya pa 6 aña consecutivo ta titulando campeon.
E aña aki a compronde cu ATCO Concrete a train hopi duro y ta bin tur cu tin pa bai cu e trofeo di prome lugar. E companianan mes a presenta cu intrumento pa toca y asina apoya nan compania y e participantenan all out.
Siguente actividad di MetaFit lo ta e Caminata cu lo start Diaranson 17 di mei 2017, keda pendiente pa esaki.