Home Uncategorized Habitantenan di Seroe Blanco contento cu gobierno a pone drempel den nan...

Habitantenan di Seroe Blanco contento cu gobierno a pone drempel den nan caya

SHARE

ORANJESTAD , Aruba – Den un entrevista sosteni cu Minister Arthur Dowers, e la splica cu trafico na Aruba a aumenta ultimo añanan y hopi di e rutanan manera esun aki den Seroe Blanco, ta wordo hopi uza como rutanan alternativo. E ruta aki riba su mes, tin hopi cas cu hopi hende ta biba den e bisindario pa basta aña caba. Mi mes a crece den e bario aki di Seroe Blanco y a hunga futbol cu mi amigonan den caya. Y loke ta resulta e ultimo añanan aki cu vehiculonan di motor a aumenta y cu e ruta aki a bira uno alternativo cu ta wordo hopi uza tanto mainta, merdia y atardi, pa entre otro hiba muchanan scol. E preocupacion cu e habitantenan tawata tin ta, e velocidad halto cu e automobilistanan ta core cu ne den bario. Y debi cu nan tin muchanan cu ta hunga den e bisindario, naturalmente ta aumenta e risico di accident. Pesey mes cu nos a bin cu e solucion, esta di pone e verkeersplateau (drempel) den e caya aki. No solamente den e caya aki cu nos a laga pone e drempel aki, pero tin hopi otro caya na Aruba cu lo bay haña esaki tambe. A inverti hopi placa mes den loke ta trata e siguridad den trafico y segun Minister Dowers cu e ta sumamente contento cu e resultadonan cu esaki ta dunando e ultimo añanan aki. “Sinembargo ainda falta y nos lo sigui inverti den esaki tambe”, Minister Dowers a continua bisando. Tin varios factor cu ta hunga un rol importante pa cu siguridad den trafico, manera por ehempel, educacion di hendenan cu ta haci uzo di openbareweg, hunto cu esaki ta bin e reglanan di trafico, pero tambe e mobilarionan manera entre otro borchi y/of tambe e drempel aki ta un ehempel di loke nos ta inverti den dje pa un trafico mas sigur pa nos comunidad. Ademas di e drempel cu nos a laga pone aki den Seroe Blanco, tambe nos lo bay traha un decreto ministerial pa laga pone borchi di trafico cu ta indica e maximo velocidad cu vehiculonan por core den e caya aki, pa di e forma aki duna e habitantenan e trankilidad bek. Pesey mes cu mi kier a yama un danki na mi colega Minister Benny Sevinger cu e tremendo cooperacion, pa departamentonan manera DOW y KPA por traha hunto y efectivo.