Home Uncategorized A tene un anochi di informacion encuanto MFA Dakota

A tene un anochi di informacion encuanto MFA Dakota

SHARE

ORANJESTAD – Oficina di maneho MFA a extende un invitacion na e comunidad di Dakota pa un anochi di informacion. E encuentro a tuma luga na sede di YMCA caminda a brinda esnan cu a asisti un presentacion amplio di loke ta e concepto di MFA, papia riba kico ta e necesidadnan di e bario y kico e ciudadanonan ta desea di inclui den e diseño di un facilidad asina na Dakota.
Director di Oficina di Maneho MFA Omar Harms, arkitecto Raffy Kock y Prome Minister MIke Eman ta entre esnan cu a comparti informacion e anochi aki. Publico tabata hopi receptivo, pero sigur tambe a contribui cu sugerencia e ideanan.
Presente tambe tabata e gerentenan y asistent di gerenta di MFA Noord, Paradera y Santa Cruz. Pa loke ta esun di Sta.Cruz a pone su prome piedra e siman aki. Nan a comparti hopi di e experiencia cu tin caba pa loke ta trata aspectonan manera cantidad di usuario, retonan imprevisto y relacion cu miembronan di comunidad.
Harms a indica cu e chens ta grandi cu lo tene un di dos anochi informativo pa asina duna oportunidad na esnan cu no por a asisti e siman aki, pa haya e presentacion, pero mas importante ainda, pa nan tambe contribui cu nan opinion.
Durante e anochi a distribui un formulario cu ta fungi como encuesta. A base di e informacion ricibi, e arkitecto hunto cu oficina di MFA y Prome Minister Mike Eman ta delinea e elementonan clave cu mester forma parti di e diseño di e edificio y e servicionan cu ta bay ofrece.
E fase aki den e desaroyo di un MFA tambe a wordo haci na e otro cinco MFA’nan cu tin planea. Ta esencial pa e Facilidad Multifuncional capta e esencia di e comunidad cu e ta bay sirbi y cumpli cu e necesidad di su hendenan.