Home Uncategorized Kimberly Kuiperi di OBID: “Musica, show di moda, regalo, wine tasting y...

Kimberly Kuiperi di OBID: “Musica, show di moda, regalo, wine tasting y hopi mas diasabra awo den Caya Grandi”

SHARE

ORANJESTAD – Diamars mainta a keda anuncia pa e siman aki y en special, diasabra awo ta dianan cu bo kier ta den nos Caya Principal G.F. Betico Croes. Kimberly Kuiperi di Oranjestad Business Improvement District (OBID) a topa cu prensa pa informa di tur loke tin prepara en conexion cu Dia di Mama. ‘T’Aki Tin’ a hinca den otro un variedad amplio di promocion y atraccion pa haci di e dia di compras uno sumamente placentero. Adicional na e programa di ‘T’Aki Tin’, e comerciante Lindy Croes ta hibando hunto cu otro tiendanan den caya un promocion cu premionan atractivo.

“Diasabra awo nos ta celebra nos persona keri nos tan stima mama aki den caya grandi. Pesey nos a acerca e comerciantenan pa puntra kico nan ta bay tin como promocion paso nos kier tin un liña di comunicacion asina tur hende sa kico ta e eventonan cu ta pasando den Caya Grandi,” Kuiperi a splica.

Manera ta conoci ‘T’Aki Tin’ tabatin diferente edicion y esun di e siman aki ta specialmente pa Dia di Mama. E actividad mas reciente tabata e exitoso Food Truck Festival cu a haci hunto cu Aruba Tourism Authority (ATA) y e programa specifico aki ta un iniciativa di Gobierno di Aruba cu e meta di trece hende den caya y pa hendenan sinti nan mes orguyoso di nan centro di ciudad.

Kuiperi a splica cu diasabra awo lo tin un show di moda di Lindy Lifestyle Boutique hunto cu Penha, tin tambe Gelatissimo Bistro riba Plasa Daniel Leo cu ta regalando e prome 50 mama cu bishita nan un gelatto gratis. Artesanonan local di Fundacion Aruba a prepara gift set special cla caba pa Dia di Mama. Tin tambe un wine tasting di Romar Trading cu ta ofrece free tasting na tur mama y tur bishitante di Caya Grandi diasabra awo, mescos cu un tasting di bebida Hapones Sake.

“Asina tin diferente promocion di otro tienda manera Dufry cu lo tin su tent cu gift set cla caba pa Mama; kier men nos ta haci bo bida un tiki mas facil,” Kuiperi a comenta bisando cu awendia hopi di nos tin costumber di laga cos pa ultimo, “dus e dia prome cu Dia di Mama ainda bo por bin cu bo mama den caya, pasa un dushi rato y bo ta haya idea kico pa regala y bo ta aporta tambe cu nos economia den caya grandi.”

Pa mas informacion riba e atraccionnan di ‘T’Aki Tin’ Edicion Dia di Mama y di e campaña ‘7 Days of Mother’s Day’, por bishita e paginanan di Facebook: T’Aki Tin y Lindy Croes.