Home Uncategorized Howard Maxwell: “Hunto den 1000voz e maneho a wordo traha pa e...

Howard Maxwell: “Hunto den 1000voz e maneho a wordo traha pa e siguiente gobernacion”

SHARE

ORANJESTAD – Durante e evento organisa door di Fundacionnan Digna Lacle Herrera y dr. Mito Croes, 1000voz, e temanan ‘Economia, Comunidad, Salubridad y Sostenibilidad’ a wordo trata. Via di e evento aki a saca for di e participantenan e puntonan di preocupacion di pueblo, kico nan lo ta interesa pa mira, di e puntonan aki den maneho di e proximo gobernacion. E sugerencianan ta wordo entrega den un rapport na partido AVP cu lo inclui e aspectonan aki den su Programa di Gobernacion.

Howard Maxwell, di e bario di Savaneta, tabata un di e participantenan di 1000voz, kende tabata masha interesa den e tema Salubridad cu e ta e area den cual e ta traha. E evento aki, el a bisa, ta hopi interesante mirando cu e ta duna e ciudadano comun y coriente e oportunidad di stipula puntonan di atencion den e programa di e proximo gobernacion di Aruba. “Participando nos por a duna nos opinion con nos ta mira e situacion awendia y con kier mire den futuro.”

Pa Maxwell Salubridad ta un tema masha importante, motibo cu el a pidi pa participa den e grupo di discusion cu tabata atende cu e tema aki. Interesante p’e tabata e discusion di e atencion den e linea primario di cuido. Hopi cos ta origina for di e prome linea di cuido. Tambe cosnan cu no ta bay bon ta cuminsa den e fase aki.  E ta bisa cu hopi tin di haber cu control cu mester tuma luga y e grupo tabata di opinion cu mester bini un tipo di consecuencia riba un funcionamento of falta di funcionamento den e linea primario.

E ta spera tambe cu loke a wordo discuti y sugeri durante 1000voz wordo hinca den otro den un forma academico den un rapport cu mester tene cuenta cune den e siguiente gobernacion. “Hunto e maneho por wordo traha pa e siguiente gobernacion,” Howell a bisa. El a gradici e organisadornan pa e evento aki, ya cu pa por tin un democracia bibo, mester tin e tipo di eventonan aki pa pueblo participa tambe. “E democracia tey y nos por wak’e, pero e parti di participa cu bo voz no tabatey. Pesey esaki ta algo unico. Mi ta hopi contento cune,” Maxwell a bisa.