Home Uncategorized Deseo di pueblo ta refleha den diseño di MFA Santa Cruz

Deseo di pueblo ta refleha den diseño di MFA Santa Cruz

SHARE

ORANJESTAD – Esey ta loke arkitecto di e proyecto a splica dialuna atardi algun momento prome cu a pone e prome piedra di construccion. Ingeniero Arubiano Ghisberto Figaroa a diseña y pinta e bunita edificio cu pueblo di Santa Cruz lo tin como su propio MFA for di prome trimester di proximo aña. E profesional di ATZPro Engineering a duna un descripcion detaye di con e MFA ta hinca den otro y kico tur a tene cuenta cune.

Trahando den e proyecto aki hunto cu oficina di MFA for di aña 2012, Figaroa a ricibi e resultadonan di e consulta haci cu pueblo di Santa Cruz pa loke nan kier mira den e edificio. Loke a resalta mas den e deseonan ta un amfiteatro caminda por duna presentacion na publico y tambe cu e edificio ta carga e bandera di Aruba. E prome a keda ubica na e parti patras di e edificio, mientras cu e bandera y su colornan ta visibel for di momento cu yega riba su fachada.

“E mesun amfiteater ta conecta cu un espacio multifuncional,” Figaroa a splica describiendo tambe con e entrada ta accentua cu combinacion di piedra natural y tambe ‘glas in lood’ den e forma y color dinos bandera nacional. E edificio ta ofrece 1.100 meter cuadra di espacio caminda ta inclui un biblioteca, sala di reunion, oficinanan di Hulpbestuurskantoor y esun di Manager di MFA mes. Sea cu trapi of den un lift, por haya acceso na e di dos piso caminda ta ubica mas luga pa sede di AZV, Impuesto of otro instancia publico of priva.

“E construccion ta uno tradicional cu bloki y vloer, segun calculacion, ta di 15 centimeter diki pa yuda carga e edificio na e miho manera posibel,” e arkitecto a splica sinta na mesa hunto cu President di Stichting Onroerend Goed Aruba (SOGA), Prome Minister Mike Eman, Minister di Infrastructura Benny Sevinger, David Britten di BIC Aruba N.V. y Fernando Kelly Manager di MFA Santa Cruz.

E reto mas grandi di e proyecto aki tabata su tereno ya cu no ta uno plat. Pa medio di diferente tecnica y tecnologia, a detecta tur e midinan y adapta esakinan na e diseño y construccion di e edificio cual su fundeshi lo ta cerca di 4 meter halto. Pa e motibo aki y otro, e arkitecto no ta anticipa ningun problema cu awa. “Si tur cos wordo traha segun e mapa, e proyecto lo no tin ningun problema cu awa. E awa lo dirigi directamente parti pazuid den dos direccion baha bay den e rooi.”