Home Uncategorized T’aki Tin un iniciativa di Gobierno di Aruba treciendo actividad den Caya...

T’aki Tin un iniciativa di Gobierno di Aruba treciendo actividad den Caya Grandi

SHARE

ORANJESTAD – E dilema di tur aña: Kico mi por cumpra pa mi mama cu ta diferente? Ke hubo si por shop pa mama hunto cu mama y asina pasa un dushi rato cu mama? Diasabra 13 di mei, tiendanan den Caya Grandi ta haci bo bida un poco mas facil dunando bo e idea perfecto pa regala mama riba su dia. Lo tin musica, show di moda, cos di bebe y come, sorpresanan pa tur mama y e miho ta cu tiendanan ta habri te 7’or di anochi.

T’Aki Tin ta un iniciativa di Gobierno di Aruba cu, den cooperacion cu comerciantenan di Caya Betico Croes, ta crea actividadnan na ocasionnan special pa aumenta e fluho di persona, e actividad comercial den tiendanan y genera un ambiente mas atractivo den nos centro di ciudad.

Pa Dia di Mama T’Aki Tin a prepara diferente tent cu gift sets/gift ideas pa mama, ‘Wine Tasting’ di Romar Trading y tambe tasting di Sake. Riba e mesun dia aki lo tin tambe ofertanan special na Dufry, Aruba Aloe y for di artesanonan local cu a traha regalo specialmente pa Dia di Mama.

Mas den e oranan di atardi lo tin un show di moda di Penha & Lindy Lifestyle Boutique, caminda lo saca e ganador di e campaña ‘7 Days of Mother’s Day’. Pa participa den e campaña ta facil. Pa cada compra di 50 Florin na un di e tiendanan participante, bo ta haya un ticket. E premionan ta, entre otro un Toaster Maker, Cena pa dos, estadia na hotel y te hasta pasashi pa dos pa Orlando cu 500 dollar cash. Ganador mester ta presenta pa ricibi su premio.

E tiendanan participante ta: Lindy Lifestyle Boutique, Gianni’s Nutrition Center, Modern Electronics, Athlete Sports, Nike, Under Armour, Amito, Ladies Choice, Mango, Dufry, JL Penha, Sport Caribe, Basinger, Shoe Balloo Sport, Maggy’s, Kairo’s Boutique, Aruba Bank N.V., Xclusive, Salina 2, Adams y Boolchand’s. Ta gradici tambe Zara, Kingdo Restaurant y Rutena Suites pa nan cooperacion.

Pa loke ta trata ambiente y con pa deleita e stoma, por bisa cu na Ricuras Café lo tin musica en bibo y prijsnan special, mientras cu na Gelatissimo riba Plasa Daniel Leo, e prome 50 mama ta haya un gelatto gratis. E regalo pa tur e mama, wela y futuro mama ta e serenata en bibo di dos galan di Aruba, esta Jeon y Roderick ‘Rocco’ Franken. Pa keda na altura di tur cos, bishita e pagina di Facebook: T’Aki Tin.