Home Uncategorized Hopi interes pa exposicion y competencia di obra di arte recicla

Hopi interes pa exposicion y competencia di obra di arte recicla

SHARE

ORANJESAD, Aruba – E aña aki a tuma luga e di 15 Exposicion y Competencia di Obra di Arte Recicla di AHATA y UNOCA, cu un participacion grandi. E artistanan a mustra nan talento y a haci uzo di materialnan recicla. A traha diferente cos, manera Kapel di Alto Vista, robot, cuadra, bestianan y hopi mas obranan.

Rodrigo Peraza ta un studiante di Scol Primario Kudawecha a participa den e AHATA Expo Recycling UNOCA y a traha un robot. Rodrigo Peraza ta gusta traha cosnan. “Mi gusta robot hopi”, Rodrigo Peraza a remarca. El a haci uzo di plastic, carton, bleki, glas y pintura.

Guadalupe Fernandez tambe a participa den e expo di reciclahe y su idea a bin pa motibo cu e a mira riba youtube un señora traha cosnan di papel y carton. Esey a inspira Gaudalupe Fernandez pa traha su proyecto unda cu el a haci uzo di carton y corant y e flornan ta haci cu papel di w.c.. “Esaki ta mi prome trabou y pero despues mi a haci tres mas pero mi a regala nan”, el a remarca. Guadalupe Fernandez a traha un vaas cu flor, el a traha un vlinder haciendo uzo di caha di lechi y casca di siboyo. E flornan ta traha di caha di webo. Guadalupe Fernandez a haci uzo di diferente material di reciclahe pa traha diferente obra pa asina participa den AHATA Expo Recycling UNOCA.

Vlijster Geerman y Joel Martis ta trahadonan di Ritz Carlton y nan a traha un chandelier completamente di corki. Pa por a traha esaki, nan a colecta e corkinan cu nan a sirbi di e biñanan pa asina yega na e cantidad cu nan tabata tin mester. E base di e luz ta un luz cu nan a haya den bari sushi despues di e fiesta di Rotaria pa asina traha e chandelier. “Na principio nos a kere cu e ta algo facil, pero como cu nos no tabata sa kico nos tabata haci precies. Nos a kere e ta bay ta un 1 2 3, pero nos mester a reuni 3 pa 4 riba nos dia liber pa logra trah’e”, Vlijster Geerman a remarca. Nan a lubida algun detaye di e chandelier y mester a desarma pa pone bek p’sina e keda bon. Nan ta haya cu e proyecto ta uno great y a disfruta di esaki y tambe a contribui na reciclahe. Esaki ta prome biaha cu nan ta participa y nan a topa cu algun reto pero na final nan a logra tur. Pa por a traha e chandelier, a haci uzo di 500 corki.

Isabel Wever ta un studiante di scol basico Mon Plaisir y el a traha un cuadra. El a haci uzo di tapanan di diferente color, verf y lijm. Isabel Wever a dura mas o menos 3 dia pa por a termina su cuadra y esaki ta prome biaha cu el a participa den e competencia. “Mi lo kier bolbe participa”, Isabel Wever a remarca.

Eugenie Bermudez-Bolaños tambe a participa den e expo di reciclahe y el a haci diferente obra. El a haci uzo di carton, corant, casca di lamunchi y apelsina y algun otro cos cu no ta haci uzo na cas el a recicla nan. “Mi ta un persona cu ta gusta traha obranan di man. Mi gusta mantene mi mes ocupa y asina mi a cuminsa traha algun cos. Mi a hay’e hopi leuk y mi no a haya nunca les di nada”, Eugenie Bermudez-Bolaños a remarca. E ta sinti su mes orguyoso di loke el a haci y e no ta den negoshi di bende, pero si un hende gusta algo e ta regal’e. Algun aña pasa el a participa pa prome biaha cu un lampi di plastic y a bay cu un premio. E ta spera di por participa y ta haya cu participacion den e expo ta importante.

E exposicion ta tuma luga ful e siman aki, unda cu por bishita esaki ainda riba dianan 10 y 11 di Mei di 8:30 AM–5:00pm, dia 12 di Mei di 8:30am–1:30pm na oficina di UNOCA situa den Stadionweg 21, patras di Cas di Cultura. Entrada ta gratis y tur hende ta bon bini pa aprecia e diferente trabounan haci cu materialnan di reciclahe.