Home Uncategorized No tin superlativo pa expresa e exito di e evento aki. “E...

No tin superlativo pa expresa e exito di e evento aki. “E confiansa tey” Philippe LaReine, President di Fundacion dr. Mito Croes a bisa.

SHARE

ORANJESTAD- For di mainta tempran e sala grandi den Hilton Hotel a cuminsa yena cu hende pa atende e evento 1000voz. Un evento cu a wordo organisa door di e fundacionnan cientifico di partido AVP Fundacion dr. Mito Croes (FESCA) y Fundacion Digna Lacle-Herrera. Sra. Digna Lacle-Herrera mes tambe tabata den sala presente pa duna su aporte participando activamente na e discusionnan. Sin duda algun por bisa cu e evento a surpasa tur expectativa.

President di Fundacion dr. Mito Croes, Philippe LaReine tabata masha satisfecho cu e atendencia masal. “Mi ta sinti mi increiblemente orguyoso di ta parti di esaki. Nos a traha cu un team completo unda e dos fundacionnan ta envolvi. Mas o menos 6 luna pasa lider di partido AVP Mike Eman a puntra nos pa drenta den un dialogo cu pueblo pa asina saca afo kico ta biba den curazon di e ciudadano. Lider di partido echt kier sa un poco mas di e deseonan cu nan tin a largo plaso.” LaReine a bisa cu ora e pregunta a wordo lansa e fundacionnan a bay den nan seno pa delibera con haci esaki. “Nos kier a haci esaki den un forma structura, academicamente y cientificamente corecto pa asina genera e feedback cu e kier a haya. Despues di nos research nos a yega na loke nos ta yama un dialogo consultativo loke a resulta den e evento 1000voz cu ta e prome paso. Pasobra no ta un voz ta wordo scucha, pero mas oro esaki ta bira miles di voz cu ta duna nan aporte.”

LaReine a splica cu diaranzon e dos fundacionnan ta trece e resultadonan den publicidad, pero prome ta presenta nan na lider di partido y su conseheronan pa mira cua ta e puntonan cu lo kier pone enfasis riba nan. Banda di e resultadonan aki ta sigui cu discusionnan adicional pa brinda e miho solucion posibel. “Nos ta toets e resultadonan cerca gruponan relevante, den caso di salubridad p.e. nos ta papia e ora cu dokternan, pashentnan, esnan cu ta traha den e sector aki pa haya asina un miho bista di loke nan kier y cu ta miho pa pueblo.”

President di Fundacion dr. Mito Croes (Fesca) a bisa cu partido AVP ta conoci pa ta un partido cu semper caba ta scucha pueblo. “Si nos no tabata haci esey, anto awe lo no tabatin e confiansa cu asina hopi hende a atende, ya cu nan sa cu nan ta wordo scucha y nan por duna e direccion tambe. E confiansa tey”, LaReine a bisa cu hopi siguransa den su voz.