Home Uncategorized Mireille Sint Jago di MEP: “Danki pueblo di San Nicolas pa boso...

Mireille Sint Jago di MEP: “Danki pueblo di San Nicolas pa boso apoyo na MEP”

SHARE

Durante fin di siman a tuma lugar un entrada masal super exitoso di partido MEP. E candidatonan riba lista y campañadornan, bou liderazgo di Evelyn Wever-Croes a forma un grupo di casi 100 voluntario pa yuda cu e lucha sagrado pa scucha e dolor, preocupacionnan y ideanan pero tambe pa informa pueblo di Aruba den e districto di San Nicolas di e berdad.

Como candidata pa e districto San Nicolas, mi ta sintimi hopi orguyoso cu mi por representa e districto aki, cu mi famia ta forma parti di su historia desde aña 1929. Di ambos banda di mi famia mi welonan a traha na Lago y contribui na e comunidad di San Nicolas. Mi tata Marcelino Wilson (Chon) Sint Jago dfm, tambe a demostra di ta un hende cu ta traha pa su comunidad: E tawata presidente di Bonaire Club. Mi mama Beulah Philips dfm, a lanta den e cas tras di Burger King y a traha como juffrouw di scol na diferente scol na San Nicolas y e tambe a duna bijles den e cas.

Campañando cas pa cas nos a ripara cu e efecto di e mal gobernacion aki NO TA DISCRIMINA! Esnan cu a vota pa e Gobierno aki tambe ta sufri bou man di e mal Gobernacion aki y durante entrada masal nos a ripara cu nan wowonan a cuminsa habri. Awor ta toca na ami pa duna mi parti pa e comunidad di San Nicolas. Ami tambe ta duna les na un scol na San Nicolas, mescos cu mi mama. Mi tambe ta presidente di un club, mescos cu mi tata. Campañando cas pa cas mi ta pidi pueblo pa duna partido MEP en general y mi persona specificamente, pa duna nos e oportunidad pa demostra cu Bon Gobernacion ta posibel na Aruba. Manera e Gabinetenan di Nelson Oduber a demostra den pasado. Ta tempo pa henter pueblo di Aruba lanta cabes y cuminsa di nobo! E Gobiernonan di Mike Eman a haci un desaster y nos mester trapa riba dje y mandele cas!! Un berguensa nan ta pa pueblo di Aruba.

Falta un tiki menos cu 5 luna pa eleccion. Mi mester bisa, cu nos tin un trabou duro nos dilanti pa salba Aruba, pero nada ta imposibel. Mi ta sinti cu e biaha aki nos por logra pa Idealismo vence Materialismo. Pa pueblo di Aruba vota consciente. Pa mi, esey ta primordial. Nos ta bay Hunto p’e Cambio y Sin Miedo nos lo logra CUMINSA di NOBO!!