Home Local Mas cu 18 cabes di carpachi horta for di Santana di Gobierno...

Mas cu 18 cabes di carpachi horta for di Santana di Gobierno na Zeewijk

SHARE

Zeewijk,- Recientemente cuidador di Santana di Gobierno na Zeewijk ta habri porta di Santana y pa di dos biaha ta topa cu un kelder kibra y e carpachi benta abou faltando cabes. E siman aki y siman pasa tambe ela pasa. Mesora nan a avisa polis y familiarnan di e defuntonan, polis a presenta y a tuma datos. Un di e carpachinan tabata di un homber y e otro di un muher, un tabata dera na aña 2004 y e otro na 2005, nan tabata den dos kelder banda di otro. Un familiar di un di e defuntonan na momento cu ela mira enberdad cu e carpachi di su mama falta cabes, esaki a haci asina hopi dolor, cu ela bira malo den santana.

Segun e cuidador di Santana, tres aña y mey pasa ela tuma encargo di e proyecto aki, pa haci e santana di Zeewijk limpi, dreche y mantene e santana, cual tabata un di santananan mas sushi y hopi bandona. Nan a cuminsa ta avisa tur famia di e defuntonan dera den santana pa bin drecha e grafnan y keldernan cu tabata kibra. Actualmente e santana ta limpi y bon manteni. Mientras cu e cuidador di santana y su grupo tabata haciendo e santana limpi, nan a topa cu varios artefactonan straño cu por ta procedente di actonan di bruheria den e santana aki.

Ela conta, cu nan a topa cu mas cu 300 boter yena cu likido, cu potret di hende y cu restonan di bestia.
Tambe nan a topa cu varios graf cu nunca a wordo manteni, nan tabata kibra, te cu e caha y e carpachinan tabata visibel, nan a tapa esakinan cu un plaachi zim, wardando si famianan lo reaciona riba e aviso cu nan a publica den medionan di comunicacion. Despues di e incidente di e siman aki, e cuidador di santana a dicidi di bay controla e 18 grafnan cu nan a tapa cu plaachi zim y pa su sorpresa, tur e carpachinan tabata falta cabes.

Aparentemente, lo ta trata di un ritual procedente di un otro nacion, algun tempo atras e cuidador di santana a conta, cu mientras e tabata trahando den Santana, ela bin topa cu un dama bisti full na biña, segun e lo tabata trata di un dama Haitiano. E dama tabata haciendo un ritual straño den santana y net na momento cu e dama tabata saliendo di e santana y ela mira e dama saliendo for di santana cu un cabes di un carpachi den su man. Mesora ela par’e y a puntr’e kiko e ta bay haci cu esaki? Segun e cuidador di Santana, e dama a splike cu e ta mula e weso di e cabes y esaki e ta bente den bebida di hende pa asina nan haci loke e ta desea. E dama lo a dun’e un ehempel, cu na un fiesta e gusta un persona e ta benta un tiki den su bebida y e persona aki ta keda henter ora banda di dje y lo haci loke e kier.

Segun e cuidador di santana, ta varios ritualnan straño nan sa mira, manera galiñanan sin cabes y sanger gespaart rond, tambe constantemente nan ta haya varios artefactonan straño den santana. Durante dia e santana di Zeewijk ta wordo bon cuida, e ta wordo habri tur dia for 7 ‘or di mainta y ta wordo cera pa 6’or di atardi. Actualmente a bira casi imposibel pa durante dia nan haci cierto ritualnan of actonan di bruheria, pero esaki no ta strobanan, nan fechorianan nan ta sigui hacinan toch. Den oranan di marduga, nan ta bula cura di e Santana, comete destruccion na e grafnan of keldernan y haci nan ritualnan of actonan di bruheria.

No tin niun clase di respet mas pa defunto, varios kelder of graf ta wordo kibra, djes pa saca e cabes di e carpachi, e cabes ta wordo usa pa cierto actonan di bruheria, voodoo of por ta pa cualke ritual di otro creyencia. No ta descarta e posibilidad cu loke a pasa den Santana di Gobierno na Zeewijk lo por ta pasando tambe den e otro santananan. Na Santanan di Paradera algun tempo a tras a haya un kelder baña na sanger, tur na muskita y holiendo hopi fies, patras na e porta di e santana, a haya banana, boonchi preto y un galiña preto den un saco.

Na santana di Santa Cruz algun aña atras a kibra e kelder di Nos Libertador Betico Croes, a kibra e caha pero pa un motibo of otro nan no a logra habrie y saca e curpa. E cuidador di santana di Zeewijk ta encarga tambe cu e mantenimento di e Santana di Sabana Basora, unda cu constantemente ta haya galiñanan sin cabes benta, te hasta tin entendi cu varios ritualnan straño ta wordo haci entre 12 or y 1 ‘or di merdia. Aparentemente algun tempo atras, algun persona lo a haya ta bon pa kibra un kelder di un defunto cu no tabata tin ni un aña dera. Tambe den e mesun santana aki, tin un grupo cu ta kibra grafnan y si defunto a wordo dera cu un pertenencia di balor nan ta horta esaki.

Na 2014, tres pa cuater carpachi a wordo horta for di Santana Catolico na Oranjestad, famia y autoridad a wordo poni na altura. Autoridad a tuma datos, pero te awe nada a sali afo di e caso aki, unda tur e carpachinan a bay a keda un misterio. Santana ta e ultimo lugar di sosiego di nos sernan keri y sigur no ta lugar pa haci ritual, e ta un falta hopi grandi di respet pa defuntonan ora kibra un graf of kelder y mas pio ora ta yega asina leu di kita e cabes di un carpachi bay cune pa haci bruheria, voodoo of ritualnan diabolico etc.

Ta spera bin mas y mihor control, di parti di e pueblo y hunto cu autoridad. Mester pone mas atencion pa loke ta pasando den nos santananan na Aruba.