Home Uncategorized RIU Palace Aruba tabata anfitrion di e cena di bon bini di...

RIU Palace Aruba tabata anfitrion di e cena di bon bini di CATA

SHARE

ORANJESTAD, Aruba – “Ta e prome biaha cu Riu Palace Aruba ta anfitrion di un evento di CATA y nos a haci’e cu hopi placer y orguyo”, asina Juan Blanco, gerente general di Riu Palace Antillas a bisa na final di e evento teni diaranson ultimo na inicio di e di 28 Conferencia Anual di Turismo di Aruba (CATA). Casi 120 participante a yega Aruba for di tur parti di Latino America, pa por haya tur informacion actualisa nan riba loke nos isla tin pa ofrece como destino, ademas di genera contacto entre e diferente entidadnan turistico y di negoshi riba nos isla.

E participantenan na CATA Aruba 2017 a haya un bon oportunidad tambe pa cera conoci cu e facilidadnan di Riu Palace Aruba y Riu Palace Antillas, cu ta ofrece un cantidad di alohamento, restaurantnan di calidad, SPA, gym, piscina, beach blanco cerca di e hotel y asina por sigui menciona. “Nos tin un grado masha halto di huespednan cu ta ripiti, pues cu ta regresa tur aña atrobe, no solamente pa nos facilidad, sino tambe pa e servicio cordial di nos empleadonan”, asina Juan Blanco a conta.

Famia Riu a funda RIU Hotels & Resorts como un hotel chikito na aña 1953, na Majorca, Spaña. Awendia RIU, cu ta partner cu TUI, e compania di tours mas grandi na mundo, ta ofrece 95 hotel, di cual riba 70% ta ofrece acomodacion “all inclusive”. RIU Hotels & Resorts ta bou maneho diario di e di tres generacion di famia Riu, cu su oficina principal na Majorca y ta conta cu riba 26 mil empleado y ta estableci den 19 pais, manera Spaña, Portugal, Irlanda, Alemania, Bulgaria, Turkia, Morocco, Merca, Mexico, Jamaica, Bahamas, Aruba, Costa Rica, Republica Dominicana, Panama, Cabo Verde, Mauritius, St. Martin y Sri Lanka.

Aki na Aruba, RIU Hotels & Resorts a habri Riu Palace Aruba na aña 2007. Debi na e gran exito di su prome hotel na Aruba, e compania a dicidi di adkiri un di dos hotel, habriendo Riu Palace Antillas na aña 2014. Hunto e dos hotelnan aki ta maneha mas o menos 25 mil huesped pa luna, cu un nivel di grado di ocupacion mas halto riba nos isla. Entre e dos hotelnan RIU na Aruba, nan ta emplea riba 800 trahado, brindando huespednan e miho nivel di servicio posibel.