Home Uncategorized Mireille Sint Jago di MEP: Ahedres tin hopi beneficio academico pa mucha

Mireille Sint Jago di MEP: Ahedres tin hopi beneficio academico pa mucha

SHARE

Riba dia 1 di mei, dia di obrero, un club nobo di ahedres a wordo habri na Playa. Un gran cantidad di hende a presenta pa celebra e inauguracion di Caquetio Chess Club na Wilhelminastraat. Como cu Minister di Deporte Dr. Alex Schwengle no a presenta na e inauguracion, mi persona cu tawata den publico simplemente pa apoya e iniciativa aki, a wordo pidi pa e presidente di directiva di Schaak Club Caquetio, Mr. Maurits Dijkhoff, pa tuma e honor di corta e cinta y pa haci e prome zet di e wega di ahedres na e club nobo aki. Esaki, como cu  semper mi ta promove, sostene y kere den beneficionan educativo di e deporte ahedres. Un honor grandi cu mi no mester a pensa dos biaha pa cumpli cu ne! Den un discurso cortico mi a splica cu mi mayornan tur dos tawata fiel hungadornan di ahedres y cu mi persona a siña hunga ahedres cu 5 aña.

 

Na varios ocacion mi a yega di skirbi articulonan pa corant, den social media y papia na radio di e beneficionan di e deporte ahedres pa nos muchanan. E ta algo scientificamente prueba cu un mucha cu ta siña practica e deporte di ahedres, ta desaroya su habilidadnan academico na un manera hopi mas lihe y fuerte. E ta mehora e habilidadnan cognitivo, pues pa siña y compronde les, pero tambe pa pensa critico y raciona miho.  E deporte aki ta trece asina hopi beneficio pa un mucha, cu varios pais a cuminsa incorpora e deporte aki na scol como parti di e curiculo durante of despues di scol. Hasta talentonan scondi di un mucha, di por ehempel liderazgo, pa organisa y di comunicacion interpersonal, cu no ta sali atraves di educacion tradicional, si ta sali na 55% di e muchanan.

 

Na Marina, CA na Merca, nan a midi un mehoracion den e habilidadnan cognitivo di muchanan despues di solamente 20 ora di instruccion di ahedres. Nan a midi un mehoracion drastico den pensamento logico, matematica pero tambe den e confiansa propio di e mucha. Cu tur otro retonan den enseñansa na Aruba, nos lo mester considera seriamente pa bin cu mas iniciativa pa ofrece e deporte aki na nos scolnan.

Den un era caminda tin hopi reto pa nos como mayornan pa zorg pa nos muchanan keda riba un bon caminda, nos lo mester duna mas aprecio y sosten na e personanan den nos comunidad cu pa añanan largo ta sigui lucha pa bienestar di nos pueblo.

 

P’esey, un biaha mas, mi kier  expresa gratitud cu mi persona a haya e honor pa corta e cinta y haci e prome zet den Caquetio Chess Club na Wilhelminastraat: E Cunucu huis net dilanti di Elmar. Mi kier gradici e board nobo lidera pa Presidente Maurits Dijkhoff y desea nan hopi exito. Pabien tambe na tur e muchanan y e mayornan cu awor tin un lugar sumamente bunita y agradabel pa nan practica e deporte di schaak.