Home Uncategorized Eldrich Tromp a sobresali durante reorganisacion di LAB HOH

Eldrich Tromp a sobresali durante reorganisacion di LAB HOH

SHARE

Hospital a saca pa prome biaha un colega di LAB HOH como empleado di luna

ORANJESTAD, Aruba –Tur luna Dr. Horacio E. Oduber ta saca su empleado di luna y e biaha aki a scoge Eldrich Tromp kende ta un Senior Analist na Fundacion Servicio Laboratorio Medico Aruba (FSLMA) miho conoci como LAB HOH. E laboratorio antes no tabata participa pa nominacion di empleado di luna y e aña aki pa prome biaha nan tin un empleado di luna como parti di Hospital.

Eldrich Tromp a keda masha sorprendi ora nan a yam’e pa un meeting urgente durante su oranan liber y a resulta cu ela wordo nomina pa cu esaki door di su coleganan.

“Mi a baha mi warda di anochi y nan a bisa mi cu nos tin un reunion urgente di rooster, unda cu mi a bin akinan y sr. Ezzard Cilié di Hunta di Directiva di HOH hunto cu mi coleganan a drenta, pa sorprende mi cu mi a sali empleado di luna”, Eldrich Tromp ta conta.

E trabou di Eldrich Tromp den laboratorio ta encera cu e ta haci e testnan di sanger y orina pa Hospital y e prikpostnan cu nan tin rond di Aruba. Tambe e ta haci e parti di ‘kwaliteit’ pa nan bay dilanti pa asina nan por yega na haya acreditacion. E reorganisacion di LAB HOH tabata un fase hopi dificil pa LAB HOH. Un grupo grandi di analista a dicidi di sigui nan carera otro caminda cu consecuencia di un ‘bezetting’ minimal di personal. Eldrich durante e tempo aki a demostra di ta un persona jong, inteligente yena cu entusiasmo y ta traha hopi duro. Ela percura pa e cooperacion di mayoria di e formacion di personal pa haci uzo di un sistema di shift nobo. Esaki ela haci na un manera hopi dinamico y alabes a crea un ambiente positivo mustrando cu e profesionalnan di LAB mes por trece solucionnan unda cu servicio na pashent ta keda primordial.

“Eldrich ta un guy cu ta gusta traha den team. Cos no mester bay na su manera pero semper e ta purba di envolve mas hende posibel pa asina nos por yega na un solucion hunto”, Tishurah Maduro, colega di Eldrich Tromp, a remarca.

Eldrich Tromp ta un empleado sobresaliente cerca LAB HOH desde inicio ora cu e tabata traha cu gobierno pa landslaboratorium, prome cu el a drenta den vaste dienst pa LAB HOH.                               Den e departamento e ta un persona cu ta yuda cu tur sorto di cos, Interim Manager, Lufrido Croes a remarca. Eldrich Tromp tin tareanan specifico cu ta di siguridad, e ta haci di auditing di calidad, y hasta a bin cu iniciativa di un shiftrooster nobo. “Semper e ta un hende habri pa yuda cu tur cos y no tin limite. Semper positivo, profesional y e ta nos prome empleado di LAB HOH cu ta bira empleado di luna”, asina Lufrido Croes a enfatisa.

Hunta di Directiva y tur colega ta gradici Eldrich Tromp pa tur su empuhe y motivacion grandi cu ela trece den LAB HOH. Masha pabien!