Home Uncategorized Anochi informativo na Dimas riba e fecha 5 y 12 di mei...

Anochi informativo na Dimas riba e fecha 5 y 12 di mei tocante e proyecto “Dreamers”

SHARE

ORANJESTAD – Riba 5 y 12 di mei tin planea sesion nan informativo na e edificio di dimas, Paardenbaaistraat 11, Oranjestad. Door cu ta anticipa cu lo bay tin hopi hende, a planea dos sesion.  E anochi informativo lo consisti di un splicacion cortico tocante e condicionan y e posibilidad pa yena e formulario pa haya un cita pa bin entrega un aplicacion den cuadro di e “proyecto dreamers” y entrega esaki na e balie na DIMAS.

E anochi informativo aki ta solamente pa e personanan cu ta kere  cu nan por cualifica pa e areglo di e “proyecto dreamers” cu ta encera:

  1. Minimo 10 (calendario) aña biba na Aruba y di e 10 aña nan aki minimo 5 (calendario) ana menor di 18 aña
  2. No por tin cuenta cu husticia

Pa personanan menor di 18 aña e exigencia ta cu un voogd of mayor cu autoridad mester ta presente.

E prome sesion lo cuminsa 7:00 p.m. y ta dura te cu 7:45 p.m. E porta ta cera 7:15 p.m.

E di dos sesion lo ta di 7:45 p.m. te cu 8:30 p.m. E porta lo cera 8:00 p.m.

Tur dos sesion lo tuma na DIMAS, situa na Paardenbaaistraat 11. Door di exigencianan pa cu e seguridad di candela, e cantidad di cuponan pa e anochi di informacion lo ta limita segun e capacidad di e sala(nan) unda ta duna e informacion.

Depende di e interes, y cantidad di persona cu presenta pa haya e informacion, lo determina si ta necesario pa pone algun sesion di informacion adicional.

Pa esnan cu no por ta presente riba e anochi informativo, lo tin e foyeto di informacion y e formulario di registracion pa cita disponibel na DIMAS y tambe por baha esaki for di riba www.dimasaruba.aw. Por mande e formulario via e-mail na officialdimasaruba@gmail.com. Y DIMAS lo invitabo pa un cita pa bin entrega bo aplicacion pa un permiso permanente den cuadro di e proyecto dreamers.