Home Uncategorized MEP DEN NOORD: HOMENAGE NA 100 CACIQUE Y LIDER DI BARIO

MEP DEN NOORD: HOMENAGE NA 100 CACIQUE Y LIDER DI BARIO

SHARE

SAVANETA – Diadomingo ultimo partido MEP a tene un evento magno na compleho deportivo Frans Figaroa. Un multitude grandi di hende a yega desde trempan y e camindanan yegando na Noord tabata geel geel di autonan cu banderin y sticker di MEP.

Na principio di e anochi lider di partido MEP sra. Evelyn Wever-Croes a duna homenage na 100 cacique y Lider di Bario cu a campaña cu Betico Croes, Nel Oduber y awor ainda. Na total Lider di MEP a entrega mas di 700 reconosemento desde November 2016. Den e sigiente lunanan lo continua cu e bunita gesto aki te ora logra entrega tur cacique, lider di bario y baluartenan.

Na e ocasion aki lider di MEP a duna un discurso cu a emociona hopi, y a impacta hopi mas. Evelyn Wever-Croes a gradisi Cacique y lidernan di bario pa nan contribucion, balentia y sosten incondicional duna na MEP y Betico y Nel durante e lucha pa nos libertad. El’a menciona cu como mucha e ta corda esnan cu tabata yuda cose bandera, esnan cu tabata encarga cu e barco di libertad, esnan cu a cuida Betico y Nel, nan conseheronan. Otronan cu a wordo maltrata hasta herida den e lucha pa nos libertad.  Tur e lidernan di bario rond Aruba, cu a campanja cu Betico y Nel cas pa cas pa por a uni e pueblo aki pa por a realisa nos Status Aparte.

Lider di MEP a ofrese su disculpa si acaso e reconosemento y gratitud por a tarda un poco pero awe esaki ta un realidad y nos lo continua cu mas reconosemento mirando cu asina tanto hende cu a yuda nos den tur skina di Aruba. Tambe el’a remarca cu talves den pasado por tabata tin cualkier motibo cu por a pone nan of un familiar aleha di MEP, kisas dor di trabaonan di tur dia di e politiconan, y cu MEP por a perde un poco contacto. “Nos lo hasi nos maximo esfuerso pa consolida e base di nos partido y traha riba esaki pasobra e partido aki ta di boso, boso a pone e fundeshi y nos generacion awe tey pa conserve. Hunto nos por sigui hasi cosnan grandi pa Aruba” segun Evelyn Wever-Croes.

Finalmente Lider di MEP a hasi un apelacion fuerte na cada un presente en bista di e eleccion e anja aki, cual ta uno di sumo importancia, pa duna MEP e sosten masal un biaha mas. “Si tin hende pa cualkier rason por a bira lomba pa MEP mi kier pidi bosonan como Cacique y  lidernan di bario boso compromiso pa ban bek na e mesun amor di antes y papia cu nan y combense nan di e importancia di proximo eleccion garantisando nan sosten bek na MEP.

Nos pais ta pasando den momentonan sumamente dificil y pesey mi ta hasi e apelacion aki na boso, pa hunto nos cambia rumbo di nos pais, y hunto nos pone Aruba bek riba e rumbo di bienestar y progreso pa tur. Mescos cu tempo di Betico y di tempo di Nel, cu e ser humano ta wordo poni central atrobe.

Finalmente mi kier bisa lo sigiente: laga nos no lubida nunca kiko lidernan di MEP den pasado a hasi pa nos, y ban lucha hunto pa trese e temponan ey bek pa nos yiunan y nan yiunan por crese den libertad, den siguridad y cu dignidad”, lider di MEP Evelyn Wever-Croes a termina bisando.