Home Uncategorized Caya Betico Croes mester wordo desaroya den un centro di recreacion y...

Caya Betico Croes mester wordo desaroya den un centro di recreacion y entretenimiento

SHARE

E motibo cu awe ta existi un klem ta pa e motibo cu e tempo ey e Minister di Husticia Arthur Dowers no kier a permiti pa e parkeerwachternan por duna boet. E Minister tabata haya cu esaki ta tarea di polis y no tabata mira viabel pa hacie posibel. A pesar cu e parkeerwachternan a ricibi un tipo di BOA opleiding manera polis y pues lo por a capacitanan pa haci esaki.
Segun Otmar Oduber di Pueblo Orguyoso y Respeta (POR), ta p’e motibo aki mester a busca pa por reenforsa di un manera of otro, pa hende respeta un proyecto di ley cu a wordo aproba pa mayoria di Parlamento y naturalmente el a pasa henter Conseho di Minister tambe pa loke ta trata parkeermeters.
‘Mi a tuma nota cu ora cu mi a bandona gobierno na november cu no a dura gobierno ni dos siman cu Prome Minister a bisa cu e ta bay elimina klem. Mientrastanto casi 7 luna a pasa y no a wak klem wordo elimina. Na tur momento nos a purba pa elimina e fenomeno di klem y bin cu sistema pa laga e parkeerwachternan duna boet na esunnan cu no ta cumpli cu ordo di trafico y parkeermeters den centro di ciudad, den e area delinea caba den ley”, pero esaki no tabata conta cu e aprobacion di e minister di Husticia.
Permiso pa construi mas mall
Ta papia di e viabilidad den Caya Betico Croes, mientras cu gobierno ta permiti pa mallnan wordo crea den tur skina, den tur bario na Aruba. Casnan ta wordo cumpra y Minister ta bay di acuerdo pa transforma e opcion cu tabatin di un vivienda pa un centro comercial.
Si gobierno ta tuma decision cu den porta di waf riba un tereno cu balor grandi cu por a haci hopi otro cos, di habri un mall aworaki den construccion riba e tereno di DOW. Y cu ya a otorga tereno caminda cu e kioskonan ta, cu unabes e kioskonan move for di banda di Arubus, lo bin un otro mall. E mesun gobierno aki ta impedi e ora, e di dos segmento di cliente cu Caya Betico Croes por haya cu ta e turismo crucero, pasobra ta impedi nan pa yega den centro di ciudad, sr. Oduber ta trece pa dilanti. ‘Ora bo weita riba e existencia y motibo di existencia di Caya Betico Croes, shopping no lo por ta e motibo mas (mester ta autocritico). Bo mester converti Caya Grandi den un centro di entretenimiento. Un “amenity” manera cu e ta na Merca y diferente otro parti di mundo caminda cu ta percura pa tin sombra pa hendenan tin gana di shop den caya. Pecrura pa tin entretenimiento den sentido di ‘cafetjes’ den henter Caya Betico Croes, restaurantnan y sitionan cu kisas hasta show ta tuma luga pa hacie un atraccion.
Turistanan y local rondona cu mall y tienda
Si enfoca un poco mas pabou, mas y mas mall ta bin rond di e hotelnan tambe. Kiermen a cera e pasada di tur turista cu ta keda den hotel, rondona nan cu mall. Cera e pasada di tur turista cu ta bin riba barconan crucero cerando e cu tur sorto di mall y sigui duna permiso pa mas mall rond di waf. Y pa e local cu tabata interesa pa bay den Caya Grandi bo a permiti cu den tur bario di Aruba tur sorto di tienda habri.
Otro destinacion pa Caya Betico Croes
E ora mi ta kere cu mester realisa cu e direccion di Caya Betico Croes mester haya otro destinacion y esey ta loke nos ta propone den nos programa. Automaticamente tur e tiendanan cu ta bende calidad lo keda lo amplia y lo inverti pa trece volumen di hende den caya, loke nan ta yama e ‘foot traffic’. Pues personanan cu ta cana keiro y shop den e area aki. Esey no ta kita cu por permiti trafico pasa mientras cu tin e tram ta coriendo. Pues tin cantidad di posibilidad, incluso fomenta condominio, apartement/vivienda na e edificionan aki pa trece e ‘foot traffic’.
E problema ta, cu pa motibo di casonan den corte y construccion malo cu a tuma luga den Caya Betico Croes, awe no por habri e trafico pa autonan pasa. Pasobra combina auto cu tram, ta masha posibel mes. Esaki no di awe, sino for di tempo cu tabata papia cu Camara di Comercio, a bisa cu esaki lo por ta posibel. ‘Prome Minister a hasta priminti esaki ora cu mi a sali for di e gobierno y te dia di awe e no a tuma luga.’
Concluyendo sr. Oduber a enfatisa cu E Forsa Nobo ta convenci cu Caya Betico Croes mester por haya un destinacion nobo. Hacie un atraccion turistico y uno cu nos propio hendenan lo ta interesa pa bishita. Mundo ta cambia y mester sa di desaroya, pero mester tin e espacio y posibilidad pa haci di Caya Grandi un atraccion nobo.