Home Uncategorized No mas klem y habri caya bek, ta loke comerciantenan den centro...

No mas klem y habri caya bek, ta loke comerciantenan den centro di ciudad ta exigi !

SHARE

Awe tawata un dia extraordinario pa nos isla. Algo cu a cuminsa den forma di un manifestacion di comerciantenan disgusta cu e maneho di Caya Betico Croes y su AruParking klem, a termina cu un discurso interumpiendo un reunion den Parlamento. Un rato despues cu un Premier anunciando di ta bay di acuerdo di inmediato cu un di e ponencianan di e comerciantenan.

Pa mas of menos 10:00am por a mira mayoria di e tiendanan den Caya Betico Croes nan porta cera y cu posternan bisando “No klem; Habri caya bek”. Mientras tanto na Plaza Daniel Leo a cuminsa aglomera un grupo representativo di e tiendanan den Caya cu pancartanan gritando “No klem; Habri caya bek”.

Despues di un rato, ora e manifestacion a coy su forsa, a dicidi pa cana bay Parlamento, na unda tabata tin un reunion publico andando. Bou guia di Cuerpo Policial e grupo di manifestantenan a drenta parlamento y a dirigi fuerte pero respetuosamente na e Presidente di Parlamento pidiendo oido pa nan ponencia. A bin un discusion entre e fraccion opositor y e Presidente di Parlamento debatiendo si e manifestantenan den representacion di Caya Grandi merece oido di nos Parlamento, si of no. Mientras esaki tabata sucediendo, Premier a subi e tribuna y a atende cu e grupo.

Fuera di e organizador di e manifestacion y vocero di e grupo, mi persona; tambe partido politiconan opositor a dirigi nan mes na Premier, tur treciendo e mes un punto padilanti: kita e klem cu ta actua di un manera represivo contra nos pueblo/cumpradornan y laga autonan bolbe transita door den Caya pa por admira e vitrinanan. Premier a duna full atencion na e manifestantenan y no a dura muchu prome cu Premier a vocifera: “Awe nos ta kita e klem!” despues di e presion di e grupo.

Fraccion di MEP a presenta mocion pa habri Caya bek, cual Prome Minister a priminti sin duna fecha.

Cu caranan di satisfaccion e comerciantenan a desaloha e tribuna di Parlamento y a reanuda nan trabou di cada dia den Caya. Un acto di valentia nunca antes visto di parti di comercio cu sigur sigur a duna su fruto.

Tatiana Eman-Mallarino