Home Uncategorized Coastal Carolina University cu anochi di informacion diamars awo dia 2 di...

Coastal Carolina University cu anochi di informacion diamars awo dia 2 di mei na Colegio EPI

SHARE

ORANJESTAD, Aruba – Diamars awo dia 2 di mei Ministerio di Enseñansa conhuntamente cu representantenan di Coastal Carolina University lo tene un anochi di informacion pa tur studiante cu tin e interes pa studia na e Universidad aki na e estado di South Carolina na Merca. E anochi di informacion lo tuma luga na e Collegezaal di EPI y lo cuminsa pa 7’or di anochi.

Durante di e anochi di informacion lo duna informacion general riba studia na Coastal Carolina University (CCU) y lo enfoca riba e diferente programanan di estudio cu e universidad tin pa ofrece y tambe lo duna informacion riba e in-state tuition special cu tin pa studiantenan di Aruba.

E anochi aki lo conta cu presencia di Darla Domke-Damonte, kende ta Associate Provost Global Initiatives di e Universidad y tambe Amy Williams, interim Associate Director di International Recruitment & Admissions. Ambos representante lo por contesta tur pregunta riba e parti di admision, programanan di estudio y tambe facilidadnan cu Coastal Carolina University ta ofrece.

Manera a wordo anuncia durante e ultimo añanan Minister Michelle Hooyboer-Winklaar, na nomber di Gobierno di Aruba, a logra formalisa diferente acuerdo na Merca y Canada cu ta garantisa areglonan special na beneficio di nos studiantenan di Aruba. Den e caso di Coastal Carolina University esaki ta e di dos Universidad na e estado di South Carolina, banda di University of South Carolina (USC), cu a reconoce formalmente e State-to-State agreement cu a keda formalisa entre Aruba y e estado di South Carolina. Door di esaki Coastal Carolina University ta ofrece e in-state tuition fee na tur studiante di Aruba cu ta encera un rebaho substancial ariba gastonan di estudio compara cu e tarifa pa studiantenan internacional.

Coastal Carolina University ta un Universidad bon reconoci na Merca y ta e di tres Universidad mas grandi di e estado di South Carolina. E areglo particular aki cu e estado di South Carolina y Coastal Carolina University ta un beneficio hopi grandi pa nos studiantenan y ta haci studia na Merca un opcion mas accesibel y atractivo pa studiantenan di Aruba.

Tur interesado y particularmente tur studiante cu ta interesa pa bay studia na Coastal Carolina University ta cordialmente invita pa e anochi di informacion. Durante di e anochi di informacion lo duna tur e informacion relevante cu studiantenan tin mester pa por bay studia na CCU y tambe lo tin espacio pa pregunta. E anochi di informacion lo tuma luga diamars dia 2 di mei 2017 cuminsando pa 7:00or di anochi na e Collegezaal di EPI (edificio cora kima na entrada principal).