Home Uncategorized Tur cos ta cla pe competencia di 12hrs Aruba

Tur cos ta cla pe competencia di 12hrs Aruba

SHARE

ORANJESTAD, Aruba – E competencia di 12 hrs Aruba di FX Sports y Cordia Aruba lo tuma luga diasabra dia 29 di April. Director di FX Sports, Wim Eelens  a cuminsa pensa riba dje 3 aña pasa, unda cu nan tabata haci esaki pa fun. E competencia ta tuma luga den oranan di anochi na Kapel di Alto Vista. E ruta di bais lo ta di 4 KM unda pa 12 ora largo teamnan tin cu dal bueltanan riba e rutanan, Wim Eelens a remarca. Lo bay tin diferente team, unda cu tin di 2, 4 y 6 hende.

Durante henter anochi di e competencia, tur team tin e chens di cambia den e wissel bak y tur lo haya un chip. E aña aki e tempo lo ta electronico, unda cu tur team lo ta pasando riba un magneet of un mat. Esaki lo tin e tempo di con lihe e ciclista a core y con largo nan buelta a dura y cuanto buelta nan a haci. Despues di 12 ora, cu lo ta diadomingo mainta pa 6:00AM, nan lo haya sa cua team tabata e miho y a haci mas buelta. “E team cu haci mas hopi buelta, lo bay cas cu un premio”, Wim Eelens a remarca. Rond di e actividadnan, nan ta purba di haci un careda cu ta inclui tur hende. “Nos a haya hopi sosten di companianan local. Nos ta aki na Garage Cordia cu semper ta para nos tras. Asina nos tin Banco di Caribe, Ennia, nos tin hopi sponsor local cu ta yuda cu e evento aki”, e director di FX Sports a remarca.

Lo bay tin un brug traha di cual hendenan por pasa over di esaki pa asina yega na e ciudad chikito traha temporalmente. Nan lo percura pe cunucu ta decora un tiki, lo bay tin ambiente cu musica pa mantene tur hende lanta, Wim Eelens a remarca. “E ta un reto pa keda lanta henter anochi plus haci deporte extremo den scur.” Nan no lo tin luznan poni, pasobra awendia tin e foksnan cu por haci uzo di dje durante coremento di anochi. Hopi hende no sa cu tin hopi rutanan cu por core den oranan di anochi. E deporte di mountain bike ta creciendo hopi. “Si mira e competencia aki, mi ta haya e ta hopi diferente di e otro competencianan. Tin e grupo cu ta activo den competi, pero esaki ta un evento cu por mira hopi cara nobo. Hende di afo, hende di Sint Maarten cu ta biniendo. Corsou ta biniendo”, asina Wim Eelens a remarca. Nan ta purba haci nan esfuerso pa promove companianan cu ta yuda nan pone e evento aki hunto. Tambe nan ta purba di inclui e publico. Aña pasa a logra cera algun placa pa asina duna esaki como donacion na Kapel di Alto Vista. Nan a purba di yuda Kapel di Alto Vista financieramente pa asina mantene e misa.

Toyota tambe ta den full swing cu FX team y pa algun aña caba ta sponsor nan evento y e team di ciclismo. “Mi tambe lo participa den e 12 ora. Nos t’ey pa yuda nan, nos t’ey como Toyota pa sponsor. Nos ta haya e evento importante y sigur pa Aruba”, Manager director di Garage Cordia Danilo Werleman a remarca. Tambe e evento ta importante pasobra tur entrada ta bay pa Kapel di Alto Vista. Ademas e ta engrandece deporte y ta trece muchanan hoben bek den deporte.

Toyota hunto cu FX a pone cu lo bay tin premiacion y un di e premionan lo ta un bais. “Hunto FX nos ta bay pone algun bais den showroom y si bo cumpra un auto bo ta bay cu e bais. Esnan cu ta interesa di un bais hunto cu Toyota, pasa libremente cerca nos”, Danilo Werleman a remarca. Diasabra cuminsando di 6:00 PM te cu diadomingo 6:00 AM e evento lo tuma luga na Kapel di Alto Vista. Tur hende ta invita pa yega y disfruta di e anochi y e ganashi lo ta pa Kapel di Alto Vista.