Home Uncategorized Prome Minister Mike Eman a haci habitantenan di Paraguana feliz

Prome Minister Mike Eman a haci habitantenan di Paraguana feliz

SHARE

ORANJESTAD – Awe habitantenan di Paraguana ta hopi contento y ta mucho mas feliz cu tempo e prome casnan a wordo traha den e bario aki mas cu 30 aña pasa. Na inicio di añanan ’80 poco-poco a cuminsa otorga tereno den e bario nobo di Paraguana cu ta situa na Tanki Leendert, entre e caminda grandi di Tanki Leendert y Soledad. Cu transcurso di tempo a construi un caminda, cu awendia no ta cumpli cu e fluho di trafico mas. E habitantenan mas cu 30 aña a biba cu e situacion aki y e hecho cu no tin ningun iluminacion di caya. Nan a haya speransa bek na momento cu Prome Minister Mike Eman y su Gabinete a introduci e programa Luz den Bario. Habitantenan manera Kathy Odor, Jose Guanipa y Carmen Guanipa a dicidi di haci lo necesario pa nan boz yega na oido di Gobierno. Nan peticion a keda honra y e siman aki e iluminacion a yega.

“Sigur nos ta contento,”sra. Kathy Odor a bisa. E tin mas cu 30 aña bibando na Paraguana. “Tempo nos a traha nos cas aki bo no por a wak ni bo mannan di scur cu e luga tabata.” Cu transcurso di añanan a bini mas cas aserca y e luz di casnan tabata duna un poco mas claridad, pero tambe e desaroyo a trece cu e caminda di Paraguana tabata wordo mas uza pa e.o. yega Soledad of e caminda di Tanki Leendert. “Cu Gobierno ta pone luz di caya ta nifica hopi pa nos. E situacion ta bira mas controlabel pa hende cu ta cana anochi y e autonan cu ta core eynan.”

Carmen Guanipa ta hopi contento cu awe e por disfruta y sinti su mes feliz cu luz di caya ta wordo poni den e bario di Paraguana. “Mi ta sintimi hopi mas sigur. Mi a tende di mi bisiñanan cu nan tambe ta contento cu awo tin claridad den nos bario.”

Jose Guanipa a yega Aruba 45 aña pasa y a establece su mes den Paraguana. E bario a crece pero iluminacion di caya, cu ta importante den bida di tur ser humano, “no a yega sino te awo danki na Prome Minister Mike Eman. Pesey nos ta hopi agradecido na ne. E ta compronde nos dolor y ta busca e solucion”. No solamente e luz ta haci Jose Guanipa contento, pero tambe e desaroyo di Aruba cu a bira su pais. “Aruba a bira masha bunita mes. Gobierno di Mike Eman a haci hopi pa mehora infrastructura di Aruba. Mira e hospital bunita cu nos ta hayando, e caya grandi cu a keda bunita, barionan a haya iluminacion, camindanan ta wordo drecha, espacionan publico ta wordo embeyece y hopi mas.”

Un deseo cu nan tur tin ta pa e caminda di nan bario wordo mehora y esnan di santo den otro barionan wordo asfalta. Pero nan ta sigur cu esaki ta den pensamento di Prome Minister Eman tambe.