Home Uncategorized Partido Pueblo Orguyoso y Respeta (POR) oficialmente por participa den eleccion venidero

Partido Pueblo Orguyoso y Respeta (POR) oficialmente por participa den eleccion venidero

SHARE

Durante conferencia di Prensa semanal di Plataforma Politico POR, varios miembro y sostenedornan tabata presente hunto cu Presidente di Conseho Electoral di Aruba kende a entrega copia di e desicion di Conseho Electoral na POR. Un momento formal den e proceso di tin un partido politico cu kier participa den e urnanan electoral caminda cu lo vota pa e proximo Parlamento dia 22 di september.

‘Desde aña pasa a cuminsa cu e proceso den fin di november y concretisa den december hunto cu sr. Andin Bikker y su organisacion y demas cantidatonan cu a presenta durante e ultimo simannan. Entre e candidatonan mester menciona tambe e participacion di nos Parlamentario independiente sra. Marisol Lopez Tromp despues di hopi deliberacion y conversacion cu a tuma luga. Despues cu a bay Cas di Cultura na december y formalisa mediante notario e existencia di e plataforma politico (POR), e proceso a inicia pa e continuacion di conversacionnan cu tabatin cu gremionan, gruponan y instancianan den nos comunidad. Sin lubida cu e aspecto formal di e participacion na e proximo eleccion tabata tumando luga. Recientemente a wordo notifica cu oficialmente e partido a wordo acepta y pa awor por notifica esaki na pueblo di Aruba’, lider di POR Otmar Oduber a splica.

Sr. Maduro: ‘Mester bisa cu tur cos a bay sin problema y locual cu nos di Conseho Electoral ta chek, ta si e statutonan di e partido ta cumpli cu ley y den e caso akinan no tin ningun problema. P’ami e ta un honor aworaki pa entrega copia di e desicion di Conseho Electoral na POR.’

Sr. Maduro a sigui bisa cu aworaki ta mas o menos 3 luna leu for di e dia cu mester presenta candidatonan pa un eleccion regular cu lo tuma luga e aña aki na september. Sr. Maduro ta opina cu e aña aki ta poco straño pasobra tur caminda di mundo ta tuma nota cu tin basta eleccion caminda cu hende ta purba di trece cambio. ‘Recientemente tabatin na Francia y Merca y si mira na Aruba ta sinti cu tin e mesun mal contento cu funcionamento politico. Francia ta un pais cu su economia/industria a sufri hopi, mescos cu Aruba e parti industrial di nos economia a haya slanan masha duro mes, pues nos no sa unda nos ta bay para ainda.’