Home Uncategorized Otmar Oduber (POR): “Banda di fondo di pension, calidad di bida di...

Otmar Oduber (POR): “Banda di fondo di pension, calidad di bida di e pensionado tambe merece atencion”

SHARE

Esunnan cu ta sostene gobierno y otronan ta papia constantemente riba fondo di e pension pero lamentablemente ningun hende ta papia riba e salud di e pensionado. Esey ta netamente locual cu nos di POR a trece dilanti y ta para pe, Otmar Oduber ta amplia riba e plannan cu E Forsa Nobo tin pa loke ta e calidad di bida di nos pensionadonan.

“Siman pasa a conversa riba e asunto di pension di nos grandinan y atrobe nos plataforma por a tuma nota cu e topiconan y temanan cu nos ta trece dilanti ta haya atencion di comunidad den su totalidad y sigur di e partidonan existente pa hopi aña. Pronto lo ta reuniendo cu APFA y OPPA pa trata programa di nos partido, unda cu hopi di nos enfoke ta riba nos pensionadonan.”

Trabou a wordo haci pa e aspecto financiero di e pension sinembargo loke ta saludabel pa e fondo ta keda cu su retonan pa futuro. E situacion cu nos a haya ta indica cu pa aña 2023 ya caba, mester cuminsa pensa riba retonan nobo cu tin den futuro. Aruba no ta creciendo mucho mas den poblacion al contrario, e ta bay cuminsa disminui mientras cu e cantidad di pensionadonan si ta keda e grupo mas grandi. E aspecto nos plataforma a pone atencion riba dje tabata netamente riba salubridad di e pensionado y e calidad di bida di e pensionado y lamentablemente no ta tende ningun hende papia riba dje.

Estudionan haci ta mustra cu mester tuma na cuenta e aspecto saludabel di e pensionado y e calidad di bida cu e mester tin na momento cu e ta cobra su pension of ta pasa di ta un pensionado. E cifranan ta preocupante ora cu mira e cantidad di hendenan cu no ta cobra un “volle pensioen”. ‘Manera cu nos a wordo splica, 80% di esunnan cu ta cobra AOV (pension di behes) ta biba unicamente di esaki. Tin hopi caso tambe cu hendenan no ta ni cobra e suma completo di e pension pa motibo di e cantidad di añanan cu nan tin na Aruba entre otro’, sr. Oduber a splica.

Mester crea un posibilidad mas husto pa e pensionadonan a base di ki trabou nan tin. No por compara un pensionado cu a traha 40 aña den oficina tras di un lessenaar cu uno cu a traha 40 aña den solo, den construccion etc. Anto exigi cu djis pasobra mester cuida e fondo di pensioen, nan mester bay te cu 65 aña cu pension.

E gobierno aki ta pensa hopi riba proyectonan grandi/miyonario y riba e aspectonan monetario unicamente siendo cu e comunidad aki ta pidiendo atencion pa e costo di bida y con nan calidad di bida ta y con nan por hiba e ultimo añanan di bida cu un pension na un forma mas saludabel. A papia riba deeltijd pensioen, crea posibilidad pa e personanan por scoge entre otro. Sinembargo gobierno no kier duna e oportunidad ey y kier djis obliga e personanan pa traha te cu 65 aña y esey ta algo cu POR ta considera cu por flexibiliza teniendo e factornan ariba menciona, Otmar Oduber a finaliza bisando.